Muxuu hoggaamiyaha IRAN ka yiri weerarkii Israel ay ku qaaday dalkiisa?

[Deeq A.]

Tehran (Caasimada Online) – Hoggaamiyaha ruuxiga ah ee Iiraan Ali Khamenei ayaa jawaab ka bixiyay duqeymaha Israa’iil ay la beegsatay dalkiisa, isagoona ku tilmaamay kuwo aan la dhayalsaneyn una baahan in jawaab laga bixiyo.

Dhanka kale Madaxweyne Masoud Pezeshkian ayaa isna sheegay in Iiraan ay “jawaab ku habboon ka bixin doonto” weerarka lagu dilay ugu yaraan afar askari, isagoo intaa ku daray in Tehran aysan raadsan dagaal.

Israa’iil ayaa sheegtay in ay beegsatay goobo milatari oo ku yaalla gobollo badan oo Iiraan ka tirsan Sabtidii, iyadoona ku tilmaamtay jawaabta gantaalladii gaarayay ku dhawaad 200-oo gantaal oo ay horay Iiraan ugu weerartay Israa’iil 1-dii bishaan Oktoobar.

Shalay Ra’iisul Wasaare Benjamin Netanyahu ayaa sheegay in Israa’iil ay cuuryaamisay difaaca hawada Iiraan iyo habka wax soo saarka gantaallada.

Waxa uu sheegay in duqeymahaasi ay si weyn u dhaawaceen awoodda difaaca ee Iiraan iyo awooddii ay u lahayd in ay soo saarto gantaallada.

“Weerarku wuxuu ahaa mid sax ah oo xooggan, waana la gaaray hadafyadii laga lahaa,” Netanyahu ayaa ka sheegay xaflad lagu xusayay dhibbanayaashii weerarradii 7-dii Oktoobar ee sannadkii hore.

Xogo ka soo baxay Iiraan ayaa lagu sheegay saameynta weerarka iyadoona la tilmaamay in inta badan gantaallada la qabtay.

Tan iyo weerarka ayuu markiisii ugu horreeyay hadlay Khamenei waxa uuna yiri: “Waxay ku xiran tahay mas’uuliyiinta inay go’aan ka gaaraan sidii awoodda iyo rabitaanka dadka Iiraan ay u gudbin lahaayeen maamulka Israa’iil iyo inay qaadaan tallaabooyin u adeegaya danaha qarankan iyo dalkaan.”

Madaxweyne Pezeshkian oo ka hadlayay shirka golaha wasiirrada ayaa isna yiri: “Ma raadineyno dagaal, laakiin waxaan difaaci doonaa xuquuqda qarankeenna iyo dalkeenna.”

Weerarrada Israa’iil ayaa ahaa kuwo aad u xaddidan sida laga soo xigtay qaar ka mid ah goobjoogayaasha.

Maraykanku wuxuu si cad ugu cadaadiyay Israa’iil inaysan duqayn warshadaha saliidda iyo xarumaha nukliyeerka, iyadoona soo jeedintaas ay u muuqatay inay raacday Tel Aviv.

Wasiirka Arrimaha Dibadda ee Iiraan ayaa Axaddii sheegay in Iiraan ay heshay calaamado ku saabsan weerar ku soo wajahan saacado ka hor inta uusan dhicin.

“Waxaan helnay illaa maqribnimadii calaamado muujinaya suurtagalnimada weerar habeenkaas,” ayuu Abbas Araghchi u sheegay suxufiyiinta, isagoo aan faahfaahin dheeraad ah ka bixin.

Waddamada Reer-galbeedka ayaa ku boorriyay Iiraan in dhankooda aysan ka jawaabin si aysan u kordhin xiisadda colaadeed ee u dhaxeysa labada dal ee bariga dhexe, taasoo ay ka cabsi qabaan inay horseedo dagaal ku fida gobolka oo dhan.

Warbaahinta Iiraan ayaa soo bandhigtay muuqaallo muujinaya nolol-maalmeedka oo si caadi ah u sii socota iyo waxyeellada goobaha ay ku dhaceen weerarrada Israa’iil oo kooban.

Waxaa wali socda dagaalka u dhaxeeya kooxda ay taageerto Iiraan ee Xisbullah iyo Israa’iil kaas oo wali ka socda Lubnaan, dhanka kale iyana waxaa socda dagaalka Qaza oo u dhaxeeya Israa’iil iyo Xamaas.

Maalinnimadii Axadda oo shalay ahayd ayay Israa’iil duqeymo ka geysatay magaalada Sidon ee koonfurta Lubnaan, waxaana ku dhintay ugu yaraan 8-qof.

Dhanka kale galinkii danbe ee shalay ayay Lubnaan sheegtay in duqeymaha Israa’iil ay ka geysatay koonfurta dalkaas lagu dilay ugu yaraan 21-qof.

Qaza, sagaal qof ayaa lagu dilay weerar ay Israa’iil ku qaadday xarun dugsi oo ku taal xerada qaxootiga al-Shati, sida ay sheegeen saraakiisha caafimaadka Falastiiniyiinta.

Warbaahinta Falastiin iyo wakaaladda wararka ee Reuters ayaa sheegay in saddex ka mid ah dadka dhintay ay ahaayeen saxafiyiin falastiiniyiin ah, iyagoo soo xiganaya saraakiil ka tirsan dowladda.

Gudaha Israa’iil, nin ayaa ku dhintay ugu yaraan 30 kalena waa ay ku dhaawacmeen ka dib markii gaari xamuul ah uu jiiray goob basaska laga raaco oo u dhow saldhig milatari oo Israa’iil ku leedahay waqooyiga Tel Aviv, taasoo ay mas’uuliyiintu sheegeen inuu ahaa weerar argagaxiso.

Isha: BBC

The post Muxuu hoggaamiyaha IRAN ka yiri weerarkii Israel ay ku qaaday dalkiisa? appeared first on Caasimada Online.