Mogadishu: Gov troops kill 21 members of Al Shabaab in Huriwaa district

[General Duke]

Al-shabaab oo looga dilay dagaal ka dhacay Huriwaa 21- maleeshiyo

 

Muqdisho, Somaliya (Calanka.com) 19-Luulyo-08

 

Sida uu kusoo bandhigay shir jaraa`id taliyaha ciidamada guutada 5-aad ee xoogga dalka Col. Cali Caraaye Gacma-Dulle ayaa waxaa ey ciidamada dowladdu ku dileen dagaalkii ka dhacay degmada Huriwaa/Yaaqshiid aroornimadii shalay meydadka kooxo uu taliyuhu ku sheegay in ey ahaayeen kuwa sheegta Al-shabaab iyo Maxkamadaha.

 

Tirada maleeshiyaadka ey dileen ciidamada dowladda ayaa waxaa uu taliyuhu ku sheegay in ey ahaayeen 21-maleeshiyo, waxa uuna sidoo kale saxaafadda tusay sawiradooda iyo waliba hub kala duwan oo ey wateen ragga la dilay.

 

 

"Dagaalkaas waxaan kaga dilnay kooxaha sheegta Al-Shabaab ilaa 21-ruux, waxaana ka dhaawacnay tiro 19-kale. Meydadkood waxey wali yaalaan wadooyinka, cidi daneyneysa", ayuu yiri Taliye Gacmo-Dulle.

 

Taliyaha ayaa sheegay in ciidamadu ey guulo ka gaareen dagaalkan islamarkaana kooxihii weerarka soo qaaday ey intii hartay firxadeen.

 

Taliyaha guutada shanaad ee ciidamada xoogga Gacmodulle ayaa ka gaabsaday khasaraha ka soo gaaray dhankooda dagaalkani.

 

Si kastaba ha ahaatee dagaalada ceynkan ah ayaa waxaa ey qeybo ka mid ah caasimadda Muqdisho ku dhexmaraan ciidamada kala duwan ee ku sugan Muqdisho iyo kooxaha kasoo horjeeda.

 

Waa markii ugu horeysay oo lagu soo bandhigo gudaha Muqdisho meydadka Al-shabaab.

 

 

Calanka.com Isha wararka xaqiiqda.