Jabuuti oo weli jawaab ka sugaysa Itoobiya kadib dekeddii ay u soo bandhigtay

[Deeq A.]

Dowladda Jabuuti ayaa sheegtay in ay weli Itoobiya ka sugayso jawaab ku aaddan deked ay Jabuuti u soo bandhigtay in ay Itoobiya u adeegsato marin badeed.

Wasiirka Arrimaha dibadda Jabuuti Maxamuud Cali Yuusuf, oo wareysi siiyay Warbaahinta Maraykanka ee VOA-da ayaa sheegay in ay weli Itoobiya ka sugayaan in ay aqbasho soo jeedintooda ku aaddan adeegsiga dekedda Tojorah.

Wasiir Maxamuud Cali Yuusuf ayaa sidoo kale tilmaamay in ujeedada ugu weyn oo ay adeegsiga dekedda Tojorah ugu bandhigeen Itoobiya ay tahay, si loo xalliyo xiisaddii ka dhalatay MOU-gii badda ee sababay Khilaafka Soomaaliya iyo Itoobiya.

“Arrintaasi wali miiska ayay saarantahay u jeedada ugu wayn ee aanu ka lahayna waxay ahayd in aanu yarayno xiisada ka dhex jirta Itoobiya iyo Soomaaliya, madaama oo ay Itoobiya raadinayso marin badeed” ayuu yiri Wasiirka Arrimaha dibadda Jabuuti.

Waxa uu sidoo kale sheegay in hadii Itoobiya ay aqbasho codsiga Jabuuti ay labada dhinac isla eegi doonaan nooca heshiiska ee ay wada-gali karaan, sida in ay wada abuuraan shirkad ganacsi taasi oo dhaqaalaha labada dal kor u qaadi doonta, waxaanu sheegay in ay wali jawaab ka sugayaan Itoobiya.

PUNTLAND POST

The post Jabuuti oo weli jawaab ka sugaysa Itoobiya kadib dekeddii ay u soo bandhigtay appeared first on Puntland Post.