Wadaado badan oo lagu dhex dilay masjid ku yaalla magaalada Wardheer

[Deeq A.]

Wardheer (Caasimada Online) – Warar kala duwan ayaa kasoo baxaya dhacdo argagax leh oo saaka ka dhacday magaalada Wardheer ee dowlad deegaanka Soomaaliya, kadib markii halkaas lagu laayay culumo aan waxba galabsan.

Maleeshiyaad hubeysan ayaa lagu soo warramayaa inay weerar ku qaadeen masjid ku yaalla gudaha magaaladaasi oo ka tirsan gobolka Doolo, waxayna ku dhex-dileen 6 wadaad oo ka tirsan culimada Ahlu Sunna Waljamaaca, sida ay innoo xaqiijiyeen ilo dadka deegaanka ah.

Wararka ayaa intaasi kusii daray in culimada la laayay ay 5 kamid ah isku hayb ahaayeen , waxaana mar qura rasaas ku furay dabley aan weli la aqoosan haybtooda, kuwaas oo goobta isaga baxsaday.

Dadka deegaanka ayaa rumeysay in culimadan loo dilay aano Qabiil darteed, maadaama colaad beeleedyo ay ka jiraan deegaanka Soomaalida.

Dhinaca kale waxaa haatan falka ku baxay ciidamada ammaanka oo wada baaritaano ku aadan sidii gacanta loogu soo dhigi lahaa dambiilayaasha oo baxsad ah.

Ma jiro war rasmi ah oo kasoo baxay ismaamulka deegaanka oo la xiriira dadkaasi lagu laayay magaalada Wardheer, kuwaas oo ahaa dad culimo ah oo ku sugnaa gudaha masjidka lagu weeraray.

Dhacdadan ayaa argagax ku noqotay dadka deegaanka, waxaana soo wajahday cabsi, maadaama masaajidkii dhexdiisa lagu beegsaday dhalinyaro culimo ah.

The post Wadaado badan oo lagu dhex dilay masjid ku yaalla magaalada Wardheer appeared first on Caasimada Online.