Israa’iil oo duqeymo is-daba joog ah xalay ka geysatay koonfurta dalka Lubnaan

[Deeq A.]

Israa’iil ayaa duqeymo is-daba joog ah xalay ka geysatay magaalada Aitaroun ee koonfurta Lubnaan, iyadoo sawirrada la soo qaaday ay muujinayaan burbur gaaray dhismayaal la deganaa.

Netanyahu ayaa sidoo kale  xalay guddoomiyay shirkaha golaha ammaanka Israa’iil, waxay meel mariyeen ballaarinta howlgallada waqooyi, wax u dhigma inay Israa’iil gudaha u galayso dhulka Labnaan.

Hadal uu gelinkii danbe ee shalay soo saaray ku-xigeenka xoghayaha guud ee Xisbullah, wuxuu sheegay in ay Israa’iil la kulmi doonto wax aysan horey u arag haddii ay gudaha usoo gasho dhulka Lubnaan.

Dhanka kale, duqeymaha ay ka geysanayaan ciidamada Isra’il Marinka Gaza ayaa sii socda weli, waxaana la xaqiijiyay dilka ilaa 14 Falastiiniyiin ah oo ku dhintay duqeymo lagu bartilmaameedsaday koofurta iyo bartamaha Gaza.

Waaxda Difaaca Rayidka ah ee Gaza ayaa sheegtay, in duqeyn lagu burburiyay guri ku yaalla magaalada Gaza lagu dilay 11 qof oo ay ku jireen 4 carruur ah iyo saddex dumar ah.

Tan iyo horraanti October, ila wareedyada Gaza ayaa ku warramay in Marinka Gaza lagu dilay in ka badan 40,000 oo Falastiinyiin ah oo u badan dumar iyo carruur.

PUNTLAND POST

The post Israa’iil oo duqeymo is-daba joog ah xalay ka geysatay koonfurta dalka Lubnaan appeared first on Puntland Post.