Xog: Xasan Sheekh oo saraakiisha ciidamada isugu yeeray kulan looga hadlay xiisadda Itoobiya

[Deeq A.]

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa kulan deg deg ah galabta isugu yeeray saraakiisha ciidamada qaranka Soomaaliya, kulankaas ayaa ka dhacay xarunta weyn ee NISA ee Habarkhadiija, sida ay ogaatay Caasimada Online.

Kulankaas oo ahaa mid xasaasi ah waxaa looga hadlay xiisadda Soomaaliya kala dhexeysa Itoobiya iyo sida cadowga looga difaaci karo dalka, hadii uu dagaal toos ah ka dhex qarxo labada dal.

Madaxweynaha ayaa warbixino ka dhageystay saraakiisha, iyadoo si weyn loo gorfeeyey inta uu gaarsiisan yahay damaca Itoobiya, waxa Soomaaliya la gudboon iyo sida cudud military loogu difaaci karo dalka.

Saraakiisha ciidamada Militariga, Nabad Sugidda iyo Booliska ayaa kulankaas galabta ku soo bandhigay warbixin ku saabsan sida ay ugu diyaar garoobeen qatar kasta oo qaranka iga imaa karta dibadda.

Sidoo kale Madaxweynaya ayaa saraakiisha weydiiyey waxyaabihii ka dhaqan galay go’aano lagu gaaray shir kan ka horeeyey oo Muqdisho ka dhacay, sida aan ku helnay xogtaan.

Waxaa la xisaabiyey ciidamada heeganka ah iyo goobaha ay kala joogaan, sidoo kale waxaa laga hadlay khataraha ka imaan kara ciidamada Itoobiya ee jooga gudaha Soomaaliya.

Sidoo kale waxaa Madaxweynaha warbixin laga siiyey dagaalka dalka looga xoreynayo Khawaarijta iyo natiijada laga gaaray fulinta amar uu bixiyey Xasan Sheekh oo ciidanka Xasilinta Caasimadda loogu jiheeyey daafaha Muqdisho, si looga hortago khatarta Khawaarijta.

Saraakiisha ayaa madaxweynaha u sheegay in duleedka Muqdisho ay ka socdaan howlgallo joogto ah, khataro badan laga hortegay iyo in dad badan lagu soo qabtay howlgallada ka socda daafaha caasimadda ee amarkiisa lagu aaday.

Kulankaan ayaa ku soo aaday xili xalay ay dowladda Itoobiya soo saartay bayaan cabasho, cabsi iyo codsi laga akhristay, kaasi oo ay walaac uga muujineyso fulinta bilaabatay ee heshiiska military ee Soomaaliya ay la gashay Masar oo ah cadowga koowaad ee Itoobiya.

The post Xog: Xasan Sheekh oo saraakiisha ciidamada isugu yeeray kulan looga hadlay xiisadda Itoobiya appeared first on Caasimada Online.