War ka soo kordhay ninkii lagu eedeeyey inuu shan gabdhood oo Soomaali ah ku dilay Minneapolis

[Deeq A.]

Heshiis qirasho ayaa miiska u saaran wiil uu dhalay wakiilkii hore ee gobolka St. Paul oo lagu eedeeyay in uu gaari soo kaxeeyay iyada oo uu shidan yahay nalka cas ee istaagga, isla markaana uu shil ka dhacay koonfurta Minneapolis xagaagii hore kaasoo shilka ku dilay shan gabdhood oo dhallinyaro ah.

Dhagaysiga Talaadadii ee maxkamada degmada Hennepin County, Kaaliyaha Xeer Ilaaliyaha Degmada Paige Starkey ayaa maxkamadda ka akhriyay dalabka Derrick John Thompson.

Starkey ayaa sheegay in dalabka qirashadu uu sii furnaan doono ilaa taariikhda maxkamadda xigta, taasoo loo asteeyay Noofambar 4.

Thompson, oo 28 jir ah kama uusan hadlin dhegaysigii Talaadadii, kaas oo socday 7 daqiiqo oo kaliya.

Dhageysiga dacwada ayaa waxaa ka soo qeyb galay xubno ka tirsan qoysaska iyo asxaabta gabdhaha dhalinyarada ah ee geeriyooday, qaarkood ayaa wajiyadooda laga dheehanayay murugo halka kuwa kalana ay ilmeynayeen.

Gabdhaha shilka ku geeriyooday ayaa kala ahaa Salma Maxamed C/qaadir oo 20 jir ahayd, Sabiriin Maxamuud Cali oo 17 ahayd, Sahra Liibaan Geesaade 20 jir, Sagal Burhaan Hersi 19, iyo Siham Adan Odawa oo Iyana 19 jir ahayd

Thompson, oo sidoo kale wajahaya eedeymo federaal ah oo la xiriira shilka, waa wiil uu dhalay xildhibaankii hore ee Minnesota John Thompson, kaasoo matalay St. Paul’s East Side 2021.

Derrick Thompson waxa uu ku jiray xabsiga dowlada dhexe ee Sherburne ilaa Diseembar 18, markaasoo la soo taagay maxkamad federal ah. Dhageysiga xeerbeegtida kiiskaas ayaa loo muddeeyay Oktoobar 7.

Sannadkii 2020, Thompson waxaa lagu xukumay California ka dib kiis lagu helay 2018, kaas oo uu ka baxsaday askar kadib markii baabuur oo uu ku dhuftay haweeney. Waxay koomo ku jirtay dhowr toddobaad. Waxa uu ku jiray tijaabo kiis markii uu dhacayay ama uu sababayay shilka Minneapolis.

Maxaan ka naqaannaa gabdhaha shilka ku dhintay?

Xarunta Islaamka ee Dar Al Farooq ayaa gabdhahan ku sheegtay inay kala ahaayeen Sabiriina Cali, Sahra Geesacadde, Salma Cabdulqaadir, Sagal Xirsi iyo Sihaam Aadam.

Sabiriina ayaa wakhti u dhow geerideeda ka qalin jebisay Iskuulka Edina High School waxayna qorsheyneysay inay ku biirto Jaamacadda Minnesota.

Sahra, ayaa iyadana dhiganeysay Jaamacadda U of M Rochester.

Salma, ayaa dhiganeysay Kuleejka Normandale.

Sihaam, ayaa dhiganeysay Jaamacadda U of M.

Sagalna waxay dhiganeysay Kuleejka Minneapolis.

Shantan gabdhood ayaa ahaa saaxiibbo aan kala harin waxayna isu diyaarinayeen arooska saaxiibbadood oo maalintii xigtay dhici lahaa.

Cabdulqaadir Maxamed oo adeer u ah Sahra Geesacadde oo BBC la hadlay ayaa sheegay inay aad uga naxeen geerida gabdhahaha.

“Runtii arrin aad u naxdin badan ayay ahayd. Familka iyo qaraabada dhammaan ilaa iyo hadda naxdin ayaa ku jirta,” ayuu yiri.

“Sahra waxay dooneysay inay dhaqtarnimo barato, waxay ahayd ardayad dhinac badan ka dhisan, balse Ilaah baa qoray arrintan.”

“Inaad weyso qof, taasi waa musiibo. Balse inaad weyso shan qof oo da’yar isla hal waqti, waa wax aad u adag in la liqo,” ayuu yiri Khaalid.

Shilkan ayaa si weyn u gilgilay Soomaalida ku dhaqan gobolka Minnesota. Kumanaan qof ayaa isugu soo baxay si ay ugu baroor diiqaan haweenkan, aaskooda oo ka mid ahaa murugada ugu weyn ee ay dadweynuhu soo bandhigaan taariikhda Minnesota. Kulaylka maalintaas wuxuu ahaa mid aan loo dulqaadan karin, macno ahaan iyo muuqaal ahaanba, iyadoo 13 qof la dhigay isbitaal intii lagu guda jiray aaska ka dhacay Qabuuraha Islaamka ee Beerta Eden ee Burnsville.

Iyadoo bulshada Soomaalida Mareykanka ay la daalaa dhacayaan khasaarahan naxdinta leh, ayaa dad badan waxa ay is weydiinayaan sida darawalkan oo taariikhi ah marka ay noqoto kiis horay loogu hayay loogu ogolaaday in uu waddada dib ugu soo laabto.

Thompson waxaa lagu xukumay sideed sano oo xarig ah laakiin waxaa la sii daayay horraantii 2023 xaalad aan caddayn. Waqtigii uu dhacay shilka Minneapolis, Thompson waxa uu ku jiray tijaabo, iyo in aqoonsiga darawalnimada oo lagala noqday xukunkii California ayaa dib loo soo celiyay saddex bilood ka hor dhacdada dhimashada

Bbcsomali

Qaran News