Ciidanka Booliska Puntland oo gacanta ku dhigay mid kamid ah maxaabiistii ka baxsaday xabsiga Gaalkacyo

[Deeq A.]

Taliska Ciidanka Booliska Puntland ayaa shaaciyay in ay gacanta ku dhigeen mid kamid ah afar maxbuus loo haysto falal argagixiso kuwaasi oo dhawaan ka baxsaday xabsi ku yaalla Gaalkacyo.

Qoraal ka soo baxay Taliska Ciidanka Booliska Puntland ayay ku sheegeen in ay gacanta ku soo dhigeen Barkhad Cawil Xirsi oo kamid ah maxaabiistii ka baxsaday xabsiga halka weli saddexdii kale lagu raad joogo.

“Ciidanka Booliska Puntland ayaa sheegay in ay gacanta ku soo dhigeen Barkhad Cawil Xirsi oo ka mid ahaa Afar maxbuus oo ka fakaday xabsi ku yaalla Galkacyo, kuwaas oo ahaa danbiilayaal dil sugayaal ah  kana tirsanaa shabakad argagixiso ah oo lagu qabtay magaalada Gaalkacyo horayna u dilay  haldoor badan oo kamid ahaa Gobolka Mudug”.

“Ciidanka Booliska Puntland ayaa abaal mariyay cidii keentay xogta dilaaga Argigixisada ah ee Barkhad Cawil Xirsi” ayaa lagu yiri Qoraalka ka soo baxay Taliska Ciidanka Booliska Puntland.

Maxaabiista weli baxsadka ku maqan ayay Booliska Puntland ku sheegeen Cabdiqani saleeban jaamac (Sayloor) Cabdullaahi Faysal xuseen (Abuujonge) iyo Cabdiraxmaan Awal maxamed (Siigayste) waxayna intaasi raaciyeen in 20,000 oo dollar lagu abaalmarin doono cid kasta oo xogtooda keenta.

PUNTLAND POST

The post Ciidanka Booliska Puntland oo gacanta ku dhigay mid kamid ah maxaabiistii ka baxsaday xabsiga Gaalkacyo appeared first on Puntland Post.