Madaxweynaha Puntland oo saaka safar ugu baxay gobolka Mudug

[Deeq A.]

Madaxweynaha Puntland Siciid Cabdullaahi Deni oo ay weheliyaan mas’uuliyiin ka tirsan golayaasha dowladda ayaa saaka safar ugu baxay gobolka Mudug.

Madaxweyne Deni oo saaka ka jarmaaday magaalada Garoowe ayaa ku sii hakan doona degmada Buurtinle ee gobolka Nugaal ka hor inta uusan u gudbin magaalada Gaalkacyo ee xarunta gobolka Mudug.

Madaxweynaha ayaa lagu wadaa in uu shirar la yeesho odayaasha iyo waxgaradka degmada Buurtinle ee gobolka Nugaal islamarkaana u kuurgalo xaaladda bulshada ku dhaqan Buurtinle iyo degaannada hoos yimaada.

Magaalada Gaalkacyo ee xarunta gobolka Mudug ayaa sidoo kale la filayaa in madaxweyne Deni shirar kula yeesho odayaasha iyo waxgaradka beelaha kala duwan ee gobolkaasi.

Safarkiisa ayaa imaanaya iyadoo xalay xabsiga saldhiga cirka ee Gaalkacyo ay ka baxsadeen saddex maxbuus oo loo haysto in ay ka tirsan yihiin kooxaha argagixisada AS.

PUNTLAND POST

The post Madaxweynaha Puntland oo saaka safar ugu baxay gobolka Mudug appeared first on Puntland Post.