Madaxweyne Deni oo farriin u diray dadweynaha codkooda ka dhiibanaya doorashada saddexda degmo

[Deeq A.]

Ku dhawaad 10 saacadood ayay si nabad ah ku socdaan doorashooyinka golayaasha degaanka degmooyinka Garoowe, Godobjiraan iyo Dangorayo oo ka tirsan gobolka Nugaal.

In ka badan 64 kun oo qof ayaa ka codaynaya 80 goobood oo ku yaalla saddexdaas degmo ah waxaana doorashada ku tartamaya 8 xisbi oo ay u sharraxan yihiin 431 musharrax oo ku tartamaya 81 kursi.

Doorashada ayaa bilaabatay saaka 6:00am subaxnimo waxaana ay goobaha cod-bixinta xirmi doonaan 6:00pm makhribnimo sida ay sheegeen guddiga doorashooyinka Puntland.

Madaxweynaha Puntland Siciid Deni oo farriin kooban u diray cod-bixiyaasha saddexda degmo ee weli safafka dhaadheer ku jira ayaa ugu baaqay in ay dulqaataan , qoraxda, dabaysha iyo harraadka si ay codkooda ugu muujiyaan xaqooda.

“Dadkaygow halkan in aad soo gaartaan wax sahlan mahan, sidaasi darteed u dulqaata , Qoraxda, Dabaysha iyo Haraadka waa hal maalin oo aad gudaneysaan xaqa aad u leedihiin in aad codeysaan, in aad wax doorataan lana idin dooran karo” ayuu yiri Madaxweyne Deni.

PUNTLAND POST

The post Madaxweyne Deni oo farriin u diray dadweynaha codkooda ka dhiibanaya doorashada saddexda degmo appeared first on Puntland Post.