Sawirro: Puntland iyo Galmudug oo qaaday talaabo ay ku joojinayaan dagaalka Sacad iyo Leylakase

Deeq A. · June 28

Gaalkacyo (Caasimada Online) – Dowlad goboleedyada Galmudug iyo Puntland ayaa masuuliyiin isku dhaf ah u diray goobihii ay beeluhu ku dagaalameen ee galbeedka gobolka Mudug.

Wafdigaan oo ay kala hoggaaminayeen Wasiirka Amniga Galmudug Maxamed Cabdi Gaboobe iyo Wasiirka Maaliyadda Puntland ayaa waxaa qayb ka ah Wasiirrada Tamarta iyo Kheyraadka Biyaha Galmudug iyo Wasiirka Waxbarashada Puntland.

Masuuliyiinta ayaa kormeer ku maray deegaanadii dirirtu ka dhacday, iyagoo markii dambe isugu yimid bartamaha goobta labada ciidan isku hor-fadhiyaan.

Beelaha Sacad Habargidir iyo Leylakase Daarood ayaa ku dagaalamaya halkaas, waxayna masuuliyiinta maanta gaartay deegaankaas wadahadal u fureen dhinacyadii dagaalamay.

Wadahadal dheer kadib, 4 qodob ayaa laga soo saaray kulamadii maanta, kuwaas oo kala ah:

1. In xabad joojin ay ka dhaqan-gasho deegaanada ay ku dagaalamayaan labada beelood, si dhiig dambe uusan u sii daadan.

2. In labada maleeshiyo beeleed laga kala qaado aaga dirirtu ka dhacday, iyadoo goobta la kala geynayo iyo waqtiga la kala qaadayo farsamadeeda dib loo gali doono.

3. In guddi labada dhinac ah oo ka xaajooda arrimaha la isku hayo oo dhulku kamid yahay lasoo magacaabo, labada dowlad goboleedna ay yeeshaan kor joogteyn.

4. In Ciidan la kala dhex dhigo goobta lagu diriray, isla markaana la xaqiijiyo qodobada sare ku xusan iyo wixii kasoo baxa guddiga la magacaabi doono.

Dagaalka labadaan beelood ayaa galaaftay nolosha dad badan, waxaana sidii colaadaas loo joojin lahaa hada u kacay dowlad goboleedyada Galmudug iyo Puntland.