Danjiraha Soomaaliya u fadhiya Qaramada Midoobey oo warbixin siiyay Shirka Golaha Ammaanka

[Deeq A.]

Wakiilka joogtada ah ee Soomaaliya u fadhiya Qaramada Midoobey Danjire Abuukar Cusmaan Baalle ayaa warbixin ku saabsan Soomaaliya ka jeediyay Shirka golaha ammaanka ee Qaramada Midoobey.

Danjire Abuukar Baalle ayaa sheegay in in uu billowday dadaal u dhexeeya Soomaaliya iyo Qaramada Midoobey, kaas oo la xiriira sidii loosoo gabagabeyn lahaa hawlaha xafiiska Qaramada Midoobey ee Soomaaliya (UNSOM).

Danjiraha ayaa u sheegay golaha ammaanka in koox farsamo oo isku dhaf ah oo ka kooban xubno ka kala socda Soomaaliya iyo Qaramada Midoobey in ay bilaabeen wada tashiyo ku saabsan sidii looga gudbi lahaa xilliga kala guurka ah ee UNSOM.

Danjiraha ayaa sidoo kale tilmaamay hawlgallada ka dhanka ah kooxda aragagixisada ah ee Al-shabaab ee ay fulinayan ciidamada xoogga dalka Soomaaliyeed, iyaga oo taageero ka helaya saaxibada caalamaka.

Hawlgalladaas waxaa ka dhashay in la xoreeyo degaano muhiim ah oo ay hore uga talinaysay argagixisadu. Guulahaas ay soo hoyeen ciidanku waxa ay kaalin muhiim ah ka qaadanayaan nabad ku soo dabaalidda Soomaaliya sida uu sheegay Abuukar Baalle.

Danjire Abuukar waxa uu ugu baaqay Beesha Caalamka in ay sii xoojiso taageerada Soomaaliya, iyaga oo bixinaya agabka iyo kaalmada farsamo ee loo baahan yahay si loo dhaqan geliyo isbedelada la qorsheeyay iyo tillaabooyinka la xiriira arrimaha amniga.

PUNTLAND POST

The post Danjiraha Soomaaliya u fadhiya Qaramada Midoobey oo warbixin siiyay Shirka Golaha Ammaanka appeared first on Puntland Post.