Muuse Biixi oo ku dhowaaqay go’aan culus oo meesha ka saaraya arrin xasaasi ah

[Deeq A.]

Hargeysa (Caasimada Online) – Madaxweynaha Somaliland Muuse Biixi Cabdi ayaa xeer madaxweyne kusoo saaray go’aan dhigaya in fal-dambiyeedka kufsiga loo daayo maxkamadaha awoodda u leh.

Madaxweyne Biixi ayaa mamnuucay in kiisaska kufsiga la xiriira lagu xaliyo hanaan dhaqan, islamarkaana looga dambeeyo hay’addaha garsoorka, waxa uuna faray in faray taliyaha ciidanka booliska iyo xeer-ilaaliyaha guud ay xaqiijiyeen dhaqan-galka arrintaan.

Go’aankan ayaa meesha ka saaraya doorkii dhaqanka ee kiisaska noocaan ah, wuxuuna imaanayaa xilli muddooyinkan dambe ay deegaanada Somaliland ku soo badanayaan fal-dambiyeedka kufsigu, kuwaasi oo khatar ku ah nabad-gelyada guud, sida uu xusay madaxweynaha.

Hoos ka aqriso wareegtada Biixi

Madaxweynaha Jamhuuriyadda Somaliland, Mudane Muuse Biixi Cabdi waxa uu wareegto Madaxweyne ka soo saaray Wax-ka-qabashada Fal-dambiyeedka Kufsiga oo ay Golaha wasiirradu fadhigii 129aad, ee qabsoomay 13/06/2024, ku go’aamiyeen in nidaamka garsoorka loo daayo go’aan ka gaadhidda arrimaha kufsiga;

Waxaanay u dhignayd wareegtada Madaxweynuhu sidan:-

Wareegto Madaxweyne

Wax-ka-qabashada Fal-dambiyeedka Kufsiga

Markaan Arkay: Qodobbada 90aad iyo 36aad ee Dastuurka Jamhuuriyadda Somaliland;

Markaan Arkay: Go’aanka Golaha Wasiirrada ee fadhigii 129aad, ee qabsoomay 13/06/2024, fadhigaas oo uu Goluhu ku go’aamiyey in nidaamka garsoorka loo daayo go’aan ka gaadhidda arrimaha kufsiga;

Markaan Arkay: In muddooyinkan dambe ay Gobollada iyo Degmooyinka dalka ay ku soo badanayaan fal-dambiyeedka Kufsigu, falalkaas oo khatar ku ah nabad-gelyada guud ee Qaranka;

Markaan Garwaaqsaday: Muhiimadda ay leedahay in sharciga la-horgeeyo eedaysanayaasha ku kaca fal-dambiyeedka kufsiga;

Waxaan Go’aamiyey;

1) In fal-dambiyeedka kufsiga loo daayo Maxkamadaha dalka ee awoodda u leh, si eedaysanayaasha ku kaca fal-dambiyadaas loo mariyo ciqaabta sharci ee ay mutaysteen, sidoo kalena loo xaqiijiyo dhawridda xuquuqaha iyo xoriyaadka aas-aasiga ah ee muwaadiniinta.

2) Waxaan farayaa Taliyaha Ciidanka Booliska iyo Xeer-ilaaliyaha Guud ee Qaranku ay xaqiijiyaan in eedaysanayaasha ku kaca fal-dambiyeedka kufsiga la horgeeyo maxkamadaha awoodda u leh, waxaana ka reeban in lagu xaliyo nidaam aan ahayn nidaamka garsoorka.

The post Muuse Biixi oo ku dhowaaqay go’aan culus oo meesha ka saaraya arrin xasaasi ah appeared first on Caasimada Online.