Digniin culus oo ku socota shacabka MUQDISHO oo la soo saaray kadib markii ay…

[Deeq A.]

Muqdisho (Caasimada Online) – Maamulka Gobolka Banaadir ayaa soo saaray digniin culus oo ku socota shacabka ku dhaqan magaalada Muqdisho, taas oo ku aadan roob xoogan oo la saadaalinayo in saacadaha soo socda uu ka da’o degmooyinka gobolka Banaadir.

Afhayeenka Gobolka Saalax Xasan Cumar (Saalax Dheere) oo shir jaraa’id qabtay ayaa sheegay in saadaasha ay muujineyso halis ka dhalan karta roobkaas, ayna ka digayaan.

Saalax ayaa ugu baaqay bulshada degan goobaha biyo fariisadka ah iyo kuwa ku nool guryaha qadiimiga ah inay ka taxadaraan roobabkaasi.

“Digniin, waxaa bulshada ku nool Gobolka Banaadir looga digayaa inay ka feejignaadaan, isla markaana ay ka taxadaraan sadaasha laga bixinayo roob xoogan oo saacadaha soo socda kusoo food leh magaalada Muqdisho” ayuu yiri afhayeenka Gobolka Banaadir.

Sidoo kale wuxuu sii raaciyay “Waxaa si gaar ah loogu digayaa dadka deggan goobaha biyo fariisadka ah iyo kuwa ku nool hareeraha guryaha burbursan”.

Dhinaca kale afhayeenka ayaa ka warbixiyay khasaaraha ka dhashay roob xoogan oo shalay ka da’ay Muqdisho, wuxuuna sheegay inuu dhaliyay dhimasho, dhaawac iyo burubur.

“Waxaa ku dumay 11 guri, waxaa ku geeriyooday canug yar ayada oo uu dhaawac fudud kasoo gaaray hal qof” ayuu mar kale yiri afhayeenka gobolka.

Afhayeenka ayaa sidoo kale intaasi kusii daray in waddooyin badan ay burbureen, sidoo kalena qaarkood ay biyaha xireen, isla markaana uu hakad galay isku socodka gaadiidka.

The post Digniin culus oo ku socota shacabka MUQDISHO oo la soo saaray kadib markii ay… appeared first on Caasimada Online.