Ciidamada Israa’iil oo wiil dhaawac oo falastiini ah ku xir-xiray afka hore ee gaari ay wateen

[Deeq A.]

Milatariga Israel ayaa sheegay in ciidamadoodu ay jebiyeen hab-maamuuska kadib markii nin Falastiini ah oo dhaawac ah ay ku xireen afaafka hore ee gaarigooda intii uu socday hawlgal ay ka fuliyeen magaalada Jenin ee daanta galbeed.

Ciidamada difaaca Israa’iil ayaa dhacdadan xaqiijiyay kadib markii laga soo duubay muuqaal lagu baahiyay baraha bulshada.

Bayaan kasoo baxay Ciidamada difaaca Israa’iil ee IDF ayaa lagu sheegay in ninkan uu ku dhaawacmay rasaas ay isweydaarsadeen intii uu socday weerarka, uuna ahaa tuhmane.

Ehelada ninka la dhaawacay ayaa sheegay in markii ay dalbadeen ambalaas ay ciidamadu kaxeysteen, kadibna ay ku xireen boonedka ama afka hore ee gaariga oo noociisu ahaa Jeep ay wateen kadibna ay kaxeysteen.

Ninka dhaawaca ahaa ayaa ugu dambayntii waxa loo gudbiyay hay’adda Laanqeyrta Cas si loogu daweeyo. IDF waxay sheegtay in dhacdadaas la baari doono.

Goob joogayaal la hadlay wakaalada wararka ee Reuters ayaa ninka ku sheegay in uu ahaa nin deegaanka ah waxaana lagu magacaabi jiray Mujaahid Azmi.

“Saakay (Sabtidii) intii lagu guda jiray howlgallada ka dhanka ah argagixisada ee lagu soo qab-qabtay dad la raadinayey oo laga shakisan yahay deegaanka Waadi Burqin, argagixisadu waxay rasaas ku fureen ciidamada IDF, kuwaas oo ku jawaabay rasaas,” ayaa lagu yiri warka kasoo baxay IDF.

Intii ay is-rasaaseyntu socotay, waxaa dhaawacmay mid ka mid ah tuhmanayaasha oo gacanta lagu dhigay.

“Iyadoo la jabiney awaamiirta iyo nidaamka caadiga ah ee hawlgalka, Eedeysanaha waxa qabtay Ciidamada difaaca Israa’iil waxayna kaxayteen isaga oo ku xiran Gaari korkiisa.

“Habdhaqanka ciidamada ee muuqaalka laga duubay ma waafaqsana qiyamka ciidamada IDF, dhacdada waa la baari doonaa, waxaana laga qaadi doonaa tallaabada ku habboon.

Dhanka kale Israel ayaa duqeyn ku dishay 42 qof magaalada Gaza. Ugu yaraan 42 qof ayaa ku dhintay waxaana ku dhaawacmay tiro intaas ka badan

labo weeraro oo cirka ah ayey Israel ku qaaday dhisme ku yaal magaalada Gaza sida ay sheegtay Xamaas.

Ciidamada Israel waxay sheegeen in ay duqeeyeen dhismo ay leeyihiin militeriga Xamaas, waxayna sheegeen in faahfaahinta ay dib ka soo sheegi doonaan.

Afhayeen u hadlay kooxaha gurmadka Gaza ayaa sheegay in dhismo deegaan ah oo ku yaal xaafadda Al-shadi dhowr jeer la duqeeyay. Duqeymaha kale waxaa lagu beegsaday guryo ku yaal degmada Al-tufaax sida ay sheegeen warbaahinta Xamaas.

Muuqaallo laga duubay goobta ayaa lagu arkayay dad dhaawac ah oo la sido iyo baadigoobka in cid badbaaday. Warar markii hore soo baxay waxay ku qiyaaseen dhimashada 42 qof.

Waxaa kor u kacay rabshado ka dhacay Daanta Galbeed tan iyo markii uu bilowday dagaalka Marinka Gaza, kaasoo ka dhashay weerarkii dhimashada badnaa ee Xamaas ay ku qaaday koonfurta Israel 7-dii October.

Qaramada Midoobay ayaa sheegtay in ugu yaraan 480 falastiiniyiin ah – xubno ka tirsan kooxo hubeysan, weeraryahanno iyo dad rayid ah – lagu dilay shilal la xiriira iskahorimaadyada oo ka dhacay Daanta Galbeed, oo ay ku jirto Bariga Quddus.

In ka badan 37,551 ayaa lagu dilay Gaza ilaa markii uu bilowday dagaalka. Tiradaas kalama saareyso rayidka iyo kuwa dagaallamayay balse waxaa la sheegay in 14,680 ay yihiin carruur, haween iyo waayeel.

bbcsomali

Qaran News