GALMUDUG oo war ka soo saartay dagaalkii la isku riiqmay ee Ceeldheer (Dhageyso)

[Deeq A.]

Dhuusamareeb (Caasimada Online) – Maamulka Galmudug ayaa faahfaahin ka bixiyey dagaalkii maanta ka dhacay degmada Ceeldheer ee gobolka Galgaduud, halkaas oo waaberigii hore ee saakay ay weerar culus ku qaaday kooxda Al-Shabaab.

Mid ka mid ah dagaaladii ugu cuslaa ayaa ka dhacay Ceeldheer, waxaana caawa magaaladii gacanta ku haya ciidanka qaranka iyo kuwa deegaanka oo iska difaacay Khawaarijta Al-Shabaab, jab culusna gaarsiiyey.

Wasiirka Amniga Galmudug Maxamed Aadan Gaboobe oo dagaalka uga waramay idaacadda VOA ayaa sharaxay sidii u uku bilowday dagaalkaas, isagoo sheegay in Shabab ay Ceeldheer wax aysan maleysaneyn.

“Khawaare weyn ma soo gaarin ciidankeena, laakiin waxaa halkaas lagu laayey Al-Shabaab, waana ku guul dareysteen wixii ay damacsanaayeen, jab culus ayey kala noqdeen halkaas, khasaarihii ay rabeen inay geystaan ayaa iyaga la gaarsiiyey,” ayuu yiri Wasiirka Amniga Galmudug.

Wasiirka ayaa sheegay in in dagaalka ay ka qeyb qaateen diyaaradaha dagaalka, kuwaas oo duqeymo culus u geystay kooxda, “Shabaab qorshahooda ma aheyn inay magalaada qabsadaan ee waxay rabeen inay khasaare geystaan taasna waa laga hortegay,” ayuu yiri.

Degmada Ceeldheer ayaa ku taalla cirifka bari ee Galmudug, wasiirka amniga waxaa la weydiiyey sababta ay qoysaska qaar ugu laaba waayeen Ceeldheer, wuxuuna qiray inay jirto cabsi ay qabaan dadka qaar.

Sidoo kale wasiirka amniga Galmudug ayaa sheegay in loo diyaar garoobay dagaalka, mar dhowna ay qorsheynayaan in dalka laga xoreeyo kooxda, gaar ahaan wuxuu carabka ku dhuftay deegaanada Galmudug iyo HirShabeelle oo lagu xoreynayo wajiga koowaad ee dagaalka oo hadda wax badan laga bedelay, sida uu sheegay wasiirku.

Dowladda Soomaaliya oo war-saxaafadeed rasmi ah ka soo saartay khasaaraha ka dhashay weerarkii saakay ay kooxda Al-Shabaab ku qaaday degmada Ceeldheer ee gobolka Galgaduud ayaa sheegtay in 47 xubnood kooxda looga dilay dagaal la isku riiqmay oo ilaa saddex goobood ka dhacay, sidoo kale dowladda ayaa shaacisay in shan askari ay kaga shahiideen dagaalka.

Hoos ka dhageyso wareysiga 

https://www.caasimada.net/wp-content/uploads/2024/06/01000000-0aff-0242-0e21-08dc87ba3694_16k.mp3The post GALMUDUG oo war ka soo saartay dagaalkii la isku riiqmay ee Ceeldheer (Dhageyso) appeared first on Caasimada Online.