DF oo ka hadashay go’aanka Jubaland iyo K/G ku diideen in Itoobiya laga saaro dalka

[Deeq A.]

Muqdisho (Caasimada Onlne) – La-taliyaha Amniga Qaranka Xuseen Macalin Maxamuud ayaa mar kale ka hadlay qorshaha dalka looga saarayo ciidamada Itoobiya, isagoo xog cusub ka bixiyey go’aanka la sheegay in Jubbaland iyo K/Galbeed ay ku diidan yihiin in ciidankaas laga saaro dalka.

Xuseen Macalin ayaa sheegay in Axmed Madoobe iyo Laftagareen ay saxiixeen qorshaha ciidanka Itoobiya looga saarayo dalka, markii la isugu yimid shirkii ugu dambeeyey ee golaha wadatashiga qaranka ee Muqdisho lagu qabtay.

Wuxuu yiri “Laftagareen iyo Axmad Madoobe waa ogyihiin, weyna taageereen qorshaha ciidamada itoobiya looga saarayo Soomaaliya, ma ogi waxa cusub ee ku soo kordhay, laakiin go’aankaas waxaa lagu gaaray shirkii ugu dambeeyey ee golaha wadatashiga qaran.”

Wuxuu intaas ku sii daray in go’aanka lagula macaamilayo caalamka ay leedahay dowladda federaalka Soomaaliya, “Xafiiska Amniga Qaranka ayaa madaxda dowlad goboleedyada iyo kuwa qaranka u soo gudbiyey intii lagu guda jiray shirka, marka si dhameystiran ayey u ogyihiin go’aankaas, una taageereen,” ayuu yiri Xuseen Macalin.

La-taliyaha amniga qaranka ayaa sidoo kale sheegay in madaxda u hadashay K/Galbeed iyo Jubbaland oo kala ah, madaxweyne ku xigeenka Jubbaland iyo wasiirka amniga K/Galbeed ay dib ugu laabtaan madaxda ka sareysa oo intii ay Muqdisho joogeen ogolaaday qorshaha ciidanka Itoobiya looga saarayo dalka.

Xuseen Macalin Maxamuud oo wareysigaan siiyey TV-ga Universal ayaa la weydiiyey waxa ka jira wararka sheegaya in dowladda federaalka ay damacsan tahay markii ciidanka Itoobiya laga saaro dalka inay dooneyso in K/Galbeed ka qabato doorasho loogu awood sheeganayo Laftagareen

Xuseen ayaa ku jawaabay, “Inta aan ka ogahay xiriirka Madaxweyne Xasan Sheekh iyo Cabdicasiis Laftagareen wax dibindaabyo ah ma jirto ama dowladda federaalka ay ka damacsan tahay K/Galbeed, xiriir kalsooni ka dhisan ayaa ka dhaxeeya labada masuul.”

Wuxuu intaas ku sii daray, in kulankii ugu dambeeyey looga tashaday sidii doorasho ay uga dhici laheyd dalka, “Ma garanaayo siyaasiyiinta labadaas maamul waxa ay biyaha hoostooda ka arkeen, laakiin waxaan ognahay in aysan jirin wax qalalaase ah oo Villa Somalia laga abaabulaayo oo Baydhaba ku socda,” ayuu hadalkiisa ku sii daray Xuseen Macalin Maxamuud.

Hoos ka daawo

The post DF oo ka hadashay go’aanka Jubaland iyo K/G ku diideen in Itoobiya laga saaro dalka appeared first on Caasimada Online.