Farmaajo iyo Xasan Sheekh: Sida loo kala sito dhibcaha guusha ay Soomaaliya gaartay

[Deeq A.]

Muqdisho (Caasimada Online) – Somaaliya ayaa markii labaad taariikhdeeda waxaa shalay loo doortay inay xubin ka noqoto 15-ka waddan ee Golaha Ammaanka ee Qaramada Midoobay.

Meertada 78-aad ee shirweynaha Qaramada Midoobay oo ka dhacay magaalada New York ee waddanka Mareykanka ayaa lagu doortay shanta xubnood ee aan joogtada aheyn ee Golaha Ammaanka, waxaana ku guuleystay Soomaaliya, Pakisan, Greece, Denmark iyo Panama.

Soomaaliya oo metalaysa qaaradda Afrika ayaa beddelaysa Mozpiak. Kursigan waxay Soomaaliya hayn doonta laba sano.

Waa markii labaad ee Soomaaliya xubin ka noqoto Golaha Ammaanka ee Qaramada Midoobay. Halmar ayay hore u dhacday waxayna aheyd 1971 illaa 1972.

Wafdi uu horkacayay wasiirka arrimaha dibadda Soomaaliya Danjire Axmed Macallin Fiqi ayaa ka qeyb-galay codeynta shalay. Shanta waddan ee la doortay ma jirin wax la tartamaayay oo horey ayaa qaaradihii iyo kooxihii ay ka tirsanaayeen waxay ugu soo garteen inay kuraastan ku fadhiistaan.

Dowladdii hore ee madaxweyne Maxamed Cabdullaahi Farmaajo ayaa xareysay codsiga Soomaaliya ee xubinnimada Golaha Ammaanka sanadkii 2018-kii, waxayna dowladdaasi u bareertay inay kursigan u raadiso Soomaaliya, iyada oo musharaxnimadeeda la wadaagtay cid walba oo ay ku jiraan Midowga Afrika, Qaramada Midoobay iyo xubnaha aan dhicin ee Golaha Ammaanka. Waxayna arrintaan kamid aheyd shaqooyinkii dhamaadka joogay ee madaxweyne Farmaajo maalintii xil-wareejinta la wadaagay madaxweyne Xasan Sheekh.

Halka dowladda hadda tallada haysa ee madaxweyne Xasan Sheekh ay iyaduna dadaalkii socday sii laba-jibaartay, nasiibna u yeelatay inay ku biiristu xilligooda kusoo aado.

Tani waxay ka dhigan tahay in dhibcaha shaqadan iyo bogaadinteedaba ay wadaagaan madaxweyne Xasan Sheekh Maxamuud iyo madaxweynihii hore ee Maxamed Cabdullaahi Farmaajo.

Golaha Ammaanka ee Qaramada Midoobay oo ah meesha lagu go’aamiyo arrimaha waaweyn ee caalamka, gaar ahaan nabadda, cuna-qabateynada, go’aamada duulaanka iyo sida dunida loogu hagayo jawi xasilloon oo damaanad qaadaya bad-qabka qof iyo qaranba ayaa ku biiristiisa Soomaaliya u leedahay macaash siyaasadeed iyo mid sumcadeed.

Laakiin dhinaca kale lama inkiri karo qataraha kaga imaan kara Soomaaliya nooca ay u gaari doonto go’aamadda waaweyn ee caalamiga ah ee lasoo hordhigi doono labada sano ee ay golahaasi fadhiso.

Shanta waddan ee shalay loo doortay xubnaha aan joogtada aheyn ee Golaha Ammaanka waxay xilka la wareegi doonaan 1-da Janaayo 2025, waxayna shaqada hayn doonaan illaa bisha December 2026.

The post Farmaajo iyo Xasan Sheekh: Sida loo kala sito dhibcaha guusha ay Soomaaliya gaartay appeared first on Caasimada Online.