Xasan Sheekh oo war kasoo saaray guusha weyn ee ay Soomaaliya gaartay caawa

[Deeq A.]

Muqdisho (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa si diirran u soo dhaweeyey in Soomaaliya loo doortay xubinnimada Golaha Ammaanka ee Qaramada Midoobey, muddo labo sano ah.

Madaxweynaha ayaa sheegay in guushan ay muujinayso horumarka iyo dowladnimada dalkeenna, waxa uuna tilmaamay qosheyaasha hagaya codka Soomaaliyeed ee fagaareyaasha caalamka, kaas oo ku salaysan ilaalinta nabadda iyo xoojinta iskaashiga.

“Guusha diblomaasi ee aanu maanta gaarnay waxa ay ka tarjumaysa sida caalamka uga markhaanti kacayo dadaalka iyo horumarka Soomaaliya, gaar ahaan dib u soo kabashada iyo dib u dhiska dalkayaga. Waa fursad aan uga faa’iideysan karno inaan ka qeyb qaadanno nabadgelyada iyo ammaanka caalamka” ayuu yiri.

Madaxweyne Xasan Sheekh ayaa u mahadceliyey dhammaan dalalka xubnaha ka ah Golaha Ammaanka, kuwa gobolka iyo Qaaradda ee taageeray codsiga Soomaaliya.

Madaxweynaha ayaa xusay in tan ay tahay fursad qiimo leh oo horseedaysa in dalkeennu uu kaalin muuqata ka qaato arrimaha amniga iyo nabadda caalamka.

Soomaaliya ayaa caawa ku guuleysatay kursiga aan joogtada aheyn ee golaha ammaanka Qaramada Midoobey, kaas oo ay ku meteli doonto muddo sanad ah Qaaradda Afrika, kursigaan ma jirin wadan kula tartamay Soomaaliya, waxayna ku gaartay galaan-galkeeda diblomaasiyadeed.

Dowladda Soomaaliya ayaa halgan dheer u soo gashay inay hesho kursigaan, wuxuuna ololaha raadinta kursigaan soo bilowday sanadkii 2018-kii.

Wasiirka arrimaha dibadda Soomaaliya Axmed Macalin Fiqi ayaa hoggaaminaya wafdiga dowladda Soomaaliya ku metelaya ergada ka qeyb gashay kulanka golaha guud ee Qaramada Midoobey oo lagu doortay shan xubnood oo Soomaaliya ay ku jirto.

The post Xasan Sheekh oo war kasoo saaray guusha weyn ee ay Soomaaliya gaartay caawa appeared first on Caasimada Online.