Sababta ay diyaarada Kenya Airways uga degi weysay Adan Cadde oo la shaaciyey

[Deeq A.]

Muqdisho (Caasimada Online) – Maareeyaha Hay’adda Duulista Rayidka Soomaaliya, Axmed Macallin Xasan oo wareysi siiyay BBC ayaa ka hadlay sababaha keenay in diyaaradaha shirkadda Kenya Airways ay maalmihii lasoo dhaafay uga dagi waayeen garoonka diyaaradaha Aadan Cadde ee magaalada Muqdisho.

Arrintan ayaa dhalisay hadal hayn xoogan, kadib markii diyaaradahaasi ay dib uga laabteen safaro ay ku tegi lahaayeen gegida diyaaradaha ee Aadan Cadde International.

Wararka ayaa sheegaya in diyaaradaha ka baaqday garoonka Muqdisho ay ahaayeen laba diyaaradood oo kala ahaa mid rakaab ah iyo mid xamuul ahayd, kuwaas oo dib uga noqday hawada magaalada Muqdisho.

Axmed Macallin Xasan ayaa howsha baaqashada diyaaradda Kenya Airways u sababreyay ay tahay “sabab cimillo”, sida uu ku sheegay wareysiga uu siiyay laanta Afka Soomaaliga ah ee BBC-da.

“Diyaaradahan ayay ku adkaatay in ay cago dhigtaan garoonka Muqdisho sababo la xiriira dabaysha xagga danbe kaga dhacaysa ee dhanka badda ka imanaysa, waa ayna diideen in ay ka soo degaan dhanka magaalada, marka dabayshu jirto. Markaa hawshani waa wax la xidhiidha cimillada” ayuu yiri maareeyuhu.

Sidoo kale wuxuu intaasinku daray, in diyaaradaha kale ay ka degayeen maalmahaas garoonka, maadaama shirkadahoodu ay muddo dheer ka shaqaynayeen Muqdisho, isla mar ahaantaana ay la qabsadeen is beddelka cimillada, waana wax ay soo wada mareen.

“Diyaaraha kale way ku dhacday, tusaale diyaaradda Turkish Airline way ku dhacday dhacdadan oo kale, madaxdoodaa noo timi, waanu ka wada hadalnay, waxaana u sharraxnay sida dabaysha Muqdisho sannadkii isu beddesho, waaxana ay oggolaadeen in diyaaradoodu aanay dhanka badda ka soo degin ee dhanka magaalada ka soo degaan” ayuu sii raaciyay Axmed Macallin Xasan.

Diyaaradda Kenya ayaa bilihii u danbeeyey bilowday duullimaadkeeda Muqdisho, waxaana madaxda ha’yadda duullimaadyada rayidka Soomaalya ay qabaan in halowshan la xallin doono, maadaamma diyaaraddan ay duulimaadyadeedu cusubyihiin.

Diyaaradaha ka degaya garoonka Aadan Cadde, ayaa hadda waxa ay soo maraan laba jid ka hor degitaankooda mid dhanka badda ah iyo mid dhanka magaalada ah ee dhismayaasha diyaaradaha ayaana amni ahaan badanaa doorbida jidka xiga dhanka badda.

“Diyaaraduhu waxay jecel yihiin dhinaca badda oo furan toosna ah, wax dhisme ah oo ateeno ah oo taagan aanu jirin, iyo badda biyaheeda oo haddii diyaaradu dhacdo caawinaya, markaa faa’iidooyinkaas darted ayay u jecel yihiin dhinacaas” ayuu mar kale yiri Axmed Macallin, naareeyaha hay’adda duulista rayidka Soomaaliya.

Marka laga soo tego shirkadda diyaaradaha Kenya Airways waxaa garoonka Muqdsho ka shaqeeya diyaaradaha Turkish Airlines, Qatar Airlines, Fly Dubai iyo Ethiopian Airlines, kuwaas oo si maalinle iyo toddobaadle ah uga dega garoonka Aadan Cadde, halka dhanka kale ay jiraan shirkado kale oo tiro ah oo sameeya duullimaadyada gudaha ah.

The post Sababta ay diyaarada Kenya Airways uga degi weysay Adan Cadde oo la shaaciyey appeared first on Caasimada Online.