Pakistan: Imran Khan iyo wasiirkiisii arrimaha dibadda oo lagu waayay wax danbi ah

[Deeq A.]

Maxkamadda sare ee Islamabad ayaa laashay xukun lagu riday ra’iisal wasaarihii hore ee Pakistan Imran Khan iyo wasiirkiisii arrimaha dibadda, Shah Mahmood Qureshi, ka dib markii hore loogu xukumay kiis la xiriira in si khaldan loo maamulay sirtii qaranka.

Hadal kooban oo ay soo saartay maxkamadda sare ayaa laba xubnood oo ka tirsan garsoorka maxkamadda sare, waxay ku dhawaaqeen in ra’iisal wasaaraha hore iyo wasiirkiisii arrimaha debedda lagu waayay kiiskii ay hore ugu xukuntay maxkamadda hoose, iyaga oo aqbalay racfaanka ay ka qaateen xukunnada hore ugu dhacay.

Go’aanka maxkamadda sare ayaa ku soo beegmaya, ka dib markii bishii January ay maxkamadda hoose ay ku xukuntay labadan masuul, min toban sannadood oo xadhig ah, ka dib markii ay maxkamadda hoose ku heshay inay si cad u shaaciyeen nuxurka xogo sir ah oo diblomaasiyadeed.

Labadan masuul ayaa ku dooday in eedaha loosoo jeediyey ay yihiin kuwo been abuur ah iyo wanjal siyaasadeed, oo aan caddaalad ku dhisnayn.

PUNTLAND POST

The post Pakistan: Imran Khan iyo wasiirkiisii arrimaha dibadda oo lagu waayay wax danbi ah appeared first on Puntland Post.