Xog: Madaxweyne Xasan oo Xaadoole farriin culus ugu dhiibay beesha ABGAAL

[Deeq A.]

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa xalay hoosta ka xariiqay sida ay uga go’an tahay in garoon diyaaradeed kan ugu weyn laga dhiso inta u dhaxeysa magaalooyinka Muqdisho iyo Warsheekh.

Aagga degmada Warsheekh waxaa ku yaalla dhul ay horay u sahmisay dowladda Soomaaliya, intii uu xafiiska joogay madaxweyne Farmaajo, waxaana dhulkaas hadda ka hor kormeer ku tegay madaxweynaha wasiiro, xildhibaano, saraakiil iyo injineero ay dirtay dowladda federaalka.

Sida ay ogaatay Caasimada Online, Madaxweyne Xasan Sheekh ayaa xalay arrintaan kala hadlay Xildhibaan Cismaan Xaadoole iyo xubno kale oo la socday oo qadiyadda Daarusalaam uu ka qanciyey, kuwaas oo Madaxweynuhu uu u cadeeyey sida ay uga go’an tahay in la dhiso garoonkaas.

Jufooyin ka tirsan beesha Abgaal oo dega aagga degmada Warsheekh, gaar ahaa Galmaax, ayaa diiday oo ciidan badan soo dhoobay deegaanka markii ay ogaadeen qorshaha dowladda oo dooneysay in la bilaabo dhismaha garoonka.

Xasan Sheekh oo xalay ka faa’iideystay kulankii uu la yeeshay guddi ka socday Abgaal oo Xildhibaan Xaadoole uu hoggaaminayey ayaa u dhiibay farriin ku socota beesha, isagoo dalbaday inay dowladda ku garab siiyaan dhismaha garoonkaas.

Madaxweynaha ayaa dhinacyo badan ka tusaaleeyey sida garoonkaasi uu muhiim ugu yahay dalka iyo sidoo kale hormarka ugu sugan deegaanka, isagoo ka dalbaday beesha Abgaal in wax shuruud ah aysan ku xirin dhismaha dhulka ay dowladdu ka hirgelineyso garoonka.

Dhinaca kale madaxweynaha ayaa Xaadoole kala hadlay tabasho dhanka awood qeybsiga ah oo beeshiisu ay qabto, isagoo ka balan qaaday in xilal muhiim ah uu u qorsheynayo beesha, si looga daaweeyo tabashadooda.

Sida aan xogta ku helnay Madaxweynaha ayaa codsaday in waqti ay siiyaan, si uu u xaliyo tabashada beesha, arrinta Daarusalaam oo ah kiiska ugu weyn ee guddigaasi uu kala hadlay ayuu madaxweynuhu u xaqiijiyey in waxaba aysan dowladdu ka qaba karin.

The post Xog: Madaxweyne Xasan oo Xaadoole farriin culus ugu dhiibay beesha ABGAAL appeared first on Caasimada Online.