Aadan Madoobe iyo Cabdi Xaashi oo loo jeediyay eedeyn culus oo la xiriirta Xasan

[Deeq A.]

Muqdisho (Caasimada Online) – Guddoonka labada Aqal ee baarlamaanka Soomaaliya Aadan Madoobe iyo Cabdi Xaashi ayaa lagu eedeeyay in ay dantooda shaqsiga ka hor mariyeen midda ummaddeed ee loo soo doortay, ayna noqdeen adeegayaal cid gaar ah.

Xildhibaan Cabdiraxmaan Cabdishakuur Warsame oo maanta shir jaraa’id ku qabtay magaalada Muqdisho ayaa labada nin ku eedeeyay inay jeebka u galeen Villada, ayna fulinayaan wixii loo soo yeeriyo iyo rabitaanka gaarka ah madaxweyne Xasan Sheekh.

“Guddoonkii labada Aqal ee baarlamaanka ay macnihii ka qaadeen baarlamaanka oo sharaftii ay ka qaadeen oo awooddiisi xil-gudasho, la-xisaabtan, daba-gal iyo kor-joogtayn meeshiiba ka baxeen,” ayuu yiri Cabdiraxmaan Cabdishakuur Warsame.

Waxa uu intaas kusii daray “Waxaa la qiimo tiray labadii Aqal ee baarlamaanka, waxayna guddoonkii jeebka u galeen Madaxtooyadda oo ay ka shaqeeyaan wax aleele iyo wixii ay rabeen, waxaana meeshaasi ku dhintay isla xisaabtankii.”

Sidoo kale waxa uu sheegay in Xildhibaannada intooda badan ay ka shaqeynayaan danahooda gaarka ah, oo qaarkoodna loo sameeyay ballan-qaadyo u muuqda “afka naga hayso”.

“Xildhibaannadii yaa dhamaantood dhihin ee intii u badneyd tooda lee raacdan, haddii ay tahay mid xil lagu sasabay, mid xoolo la siiyay, haddii ay tahay mid dhul hanti-qaran ah lagu laaluushay iyo haddii ay tahay mid la yiri waxaa ku jirtaa liiska doorashada qof iyo cod ee halka deegaan ah.”

Dhinaca kale, waxa uu Xildhibaanka carabaabay in dadka reer Muqdisho laga maadsanayo, oo waqtiga looga lumiyay wax macno laheyn oo qabiil u ek inay maanta oo dhan isku haystaan.

“Shacabka sidaas u daalan ee u dhibaateysan waxaa meel kasta lala taagan yahay wax la yiraahdo canshuur xadhko goosatay, oo aan la garaneyn jeebka ay ku dhacdo.”

Waxa uu intaas sii raaciyay “Dowladda waxay ku dhisan canshuurta muwaadinka laga qaado nooc kasta oo ay tahay laakiin waxaa muwaadinka canshuurta looga qaado in looga adeego, marka waxaa islaheyn xadka canshuurta la qaado iyo adeega wax lagu qabto.”

The post Aadan Madoobe iyo Cabdi Xaashi oo loo jeediyay eedeyn culus oo la xiriirta Xasan appeared first on Caasimada Online.