Xasan iyo socdaalka Nairobi: Maxaad ka ogtahay labada runta iyo halka beenta ah?

[Deeq A.]

Nairobi (Caasimada Online) – Madaxweynaha Soomaaliya Xasan Sheekh Maxamuud ayaa Talaadaddii tegay magaalada Nairobi markii shanaad wax ka yar afar bilood.

Safarka madaxweynaha ayaa mucaaradka ku ladheen arrimo shidaal, balse waxaa taas beeninaya shirweynaha Bangiga Horumarinta Afrika, kaas oo leh qeyb heer madaxweyne ah.

Madaxweyne Xasan Sheekh Maxamuud inkasta oo lagu dhaliilo karo in uusan wax badan u hanbeynin ra’iisul wasaarihiisa Xamza Cabdi Barre, marka laga hadlayo safarada heerka sare, haddana safarkaan wuxuu leeyahay labo ujeedo oo isa saaran.

1. Ka qeyb-galka shirka Bangiga Horumarinta Afrika

Soomaaliya oo kamid ah dalalka dhaqaale ahaan qaaradda ugu hooseeya, raadineysana kobac cusub oo dhanka horumarka loo marayo waa u muhiim inay joogto shirkaan.

Xasan ayaa shalay ka qeyb-galay shirkaan, isaggoo ka sheegay.

2. Farriinta uu madaxweynaha Kenya ka keenay Mareykanka

Intii uusan madaxweynaha Kenya aadin waddanka Mareykanka 23-kii bishaan oo uu ka helay State-Visit, waxa uu Nairobi kula kulmay madax badan oo African ah oo uu ka qaadayay farriimo toos loo gaarsiinayo madaxweynaha Mareykanka Joe Biden.

Waxa uu William Ruto noqday 16 sano kadib madaxweynihii u horreeyay ee African ah ee State-Visit ku tega Aqalka Cad. Waxaa ugu dambeeyay madaxweynihii hore ee Chana John Kavor, oo booqasho noocaasi ah ka helay Aqalka Cad.

Marwalba madaxweynaha hela booqashada noocaan ah waxaa laga wareystaa, farriimana loogu soo dhiiba guud ahaan qaaradda Afrika, gaar ahaan kuwa deriska la’ah waddankiisa.

Madaxweyne Xasan Sheekh inta uu safarkan ku jiro waxay gaar isku arki doonaan William Ruto, waxaana la filayaa inuu raadinayo natiijada ka timid Aqalka Cad, maadaama waxyaabaha Soomaaliya miiska u saaran aragtida Mareykanka looga maarmin ay kamid tahay bixitaanka ciidanka ATMIS, kuwaas oo qorshuhu yahay inay dalka ka baxaan bisha December ee sanadkaan.

Balse dowladdaha waaweyn ee taageera Soomaaliya ayaa ka walaacsan waxa ka dhalan kara bixitaanka ATMIS.

3. Kusoo noq-noqashada Xasan ee Nairobi

Midda saddexaad ee mucaaradka ku doodayaan waa in kusoo noq-noqashada Xasan Sheekh ee magaalada Nairobi inay la xiriirto faa’iido wadaag shidaal, maadaama ay Kenyanka rabaan in wax laga siiyo kheyraadka ku jira aaggii ay marhore maxkamadda cadaaladda adduunka u xukmisay Soomaaliya.

Laakiin arrintaan hadda laguma dhiiran karo oo Kenya weli ma aqbalin go’aankii maxkamadda, iyada oo aanay Kenya aqbalin go’aankaasna ma muuqato fursad looga doodi karo faa’iido wadaag xilli ay shirkado badan oo shidaal daneynayaan inay aaggaasi ka howl bilaaban.

The post Xasan iyo socdaalka Nairobi: Maxaad ka ogtahay labada runta iyo halka beenta ah? appeared first on Caasimada Online.