Hoggaamiyaha SSC-Khaatumo oo digniin u diray Somaliland

[Deeq A.]

Hoggaamiyaha Maamulka SSC Khaatumo Cabdiqaadir Axmed Aw Cali Firdhiye ayaa Somaliland uga digay in ay dagaal kale ku qaado deegaanada SSC-Khaatumo, isaga oo sheegay in ay jabindoonaan.

Hoggaamiye Firdhiye oo ku sugan dalka Talyaaniga, ayaa mar uu la hadlayey jaaliyada reer SSC-Khaatumo ee magaalada Rooma waxaa uu sheegay in hadii maamulka Somaliland ay weerar kusoo qaadaan deegaanadiisa ay ku jabi doonto.

“Hada Muuse waa soo xayd xaydanayaa, intii dagaalka lagu guda jiray hablaha reer Hargaysa waxaa hal ku dhag u ahayd Muusow ciidanka fasax, Muuse hada wuxuu leeyahay ka baydha waan fasaxayaaye, inshallah wuu ku jabi” ayuu yidhi Firdhiye.

Somaliland ayaa dhankeeda sheegtay in ay si dhakhso ah gacanteeda ugu soo celin doonto deegaanadii ay ku lumisay dagaalkii kal hore ka dhacay gobolka Sool.

Dhaqdhaaqyo dagaal ayaa laga soo warinayaa inay ka jiraan furimaha ay isku hor fadhiaan ciidanka Somaliland iyo kuwa SSC-Khaatumo, kadib markii Somaliland ay ciidan iyo saanad milatari kusoo daad guraysay, iyadoo xili kasta uu dagaal ka dhex qarxi karo labada dhinac.

PUNTLAND POST

The post Hoggaamiyaha SSC-Khaatumo oo digniin u diray Somaliland appeared first on Puntland Post.