Ra’iisul Wasaare ku-xigeenka XFS oo ka qeyb-galaya Shir Madaxeedka dalalka Islaamka

[Deeq A.]

Ra’iisul Wasaare ku-xigeenka Xukuumadda Federaalka Soomaaliya  Saalax Axmed Jaamac ayaa gaaray caasimadda Gambia ee Banjul, halkaas uu kaga qeyb-galayo shir madaxeedka dalalka islaamka.

Wakiilka gaarka ah ee Soomaaliya u qaabilsan geeska Afrika, badda cas iyo gacanka cadmeed Danjire Yuusuf Garaad Cumar Axmed ayaa sheegay in Ra’iisal Wasaare ku-xigeenka XFS Saalax Axmed Jaamac oo wakiil ka ah Madaxweyne Xasan Sheekh uu ka qeyb-galayo shir madaxeedka dalalka islaamka oo maanta ka furmaya magaalada Banjul.

Shir madaxeedkan oo goor-dhow furmaya ayaa looga hadli doonaa arrimaha siyaasadda ee saamaynta ku leh dunida islaamka, si gaar ah arrinta Falastiin.

Hoggaamiyeyaasha wadamada xubnaha ka ah Ururka Iskaashiga Islaamka, waxay mudnaanta siin doonaan arrimaha dhaqaalaha, bani’aadannimada, bulshada iyo dhaqanka, si gaar ah arrimaha ku qotoma dhalinyarada, haweenka, qoyska, culuumta, tiknoolojiyadda, warfaafinta iyo bulshooyinka muslimka ah.

Ajandaha shirka waxaa sidoo kale lagu soo hadal-qaadi doonaa diididda hadallada islaam nacaybka, kor u qaadidda wadahadalka, arrimaha isbeddelka cimillada iyo sugnaanta cuntada.

PUNTLAND POST

The post Ra’iisul Wasaare ku-xigeenka XFS oo ka qeyb-galaya Shir Madaxeedka dalalka Islaamka appeared first on Puntland Post.