Somalia oo taageero cusub oo la xiriirta xiisada Itoobiya ka heshay shir ka dhacay…

[Deeq A.]

Banjul (Caasimada Online) – Dowladda federaalka Soomaaliya ayaa taageero muhiim ah ka heshay shirka wasiirrada arrimaha dibadda ee dalalka Islaamka oo xalay xilli dambe lagu soo gaba-gabeeyay Banjul ee caasimada Gambia.

Shirka ayaa waxa uu qoraal ku taageeray nabad-gelyada, xasilloonida, madax-bannaanida iyo wada-jirka dhuleed ee Soomaaliya, xilli ay taagan tahay xiisadda Soomaaliya iyo Itoobiya oo meel sare gaartay kadib markii xukuumadda Abiy heshiis beenaad ay ku rabto dhul badeed la saxiixtay Somaliland.

Sidoo kale waxay wasiirrada dalalka Islaamka ay qoraalkooda ku sheegeen in aanay aqbaleyn fal xad-gudub ku ah madax-bannaanida iyo wada-jirka dhuleed ee Soomaaliya, taasi oo xoojineysa guusha diblumaasiyadeed ee dowladda federaalka ka gaartay xad-gudubka Itoobiya.

Shirka ayaa isaga oo taageeraya xoojinta kaalinta Soomaaliya ay ku leedahay fagaarayaasha caalamka iyo urur goboleedyada wuxuu hoosta ka xarriiqay taageerayna murashaxnimada Fawziya Yusuf Xaaji Adan, oo ah murashaxa Soomaaliya ee guddoomiyaha Midowga Afrika.

Dhinaca kale, Wasiirka arrimaha dibadda Axmed Macallin Fiqi oo hoggaaminayay ergada Soomaaliya ayaa waxa uu kulammo doceed uu si gooni ah ula yeeshay wasiirrada dhiggiisa ah ee dalal dhowr ah ay kusoo dhammaadeen is af-garad.

Xubnaha wafdiga Soomaaliya oo qaar ay ku koobnaayeen galaan-galka iyo taageerada murashaxnimada Fawziya, waxaa ka mid ahaa laba wasiir oo hore oo arrimaha dibadda ah, dannjiraha Soomaaliya u fadhiya Midowga Afrika, wakiilka Soomaaliya ee ururka dalalka Islaamka ah iyo diblumaasiyiin kale.

Maalinta berrito ayaa waxaa lagu wadaa in magaalada Banjul uu ka furmo shir madaxeedka dalalka Islaamka, kaasi oo ay ka qeyb-galayaan 57 dal oo xubno ka ah ururka.

The post Somalia oo taageero cusub oo la xiriirta xiisada Itoobiya ka heshay shir ka dhacay… appeared first on Caasimada Online.