Maxaad ka ogtahay arrinta dhashay musuqa ‘xarkaha goostay’ ee Soomaaliya?

[Deeq A.]

Muqdisho (Caasimada Online) – Marka maqasho ereyga musuq oo lala xiriiranayo hay’addaha dowladdaada, waxaa durba kugu soo dhacda lacag la xaday ama hanti dowladeed oo sifo sharci darro ah lagu qaatay, iyada oo laga faa’iideysanayo fursad xukun heerka ay doontaba ha leekaate.

Laakiin weli ma isweydiisay marka dowladnimada laga hadlayo musuqa jeebka yaa dhalay?

Ereygaan meel ku qoro musuqa jeebka waxaa dhalay musuqa xilalka. Si aad u fahamto qodobkan isweydii imisa qof ayaad taqaana maanta, kuwaas oo loo dhiibay shaqo dowladeed oo aanay aqoonteeda laheyn, tartan ku helin, tii oo dhinaca kale laga yaabo in qofkaas uu leeyahay diiwaan xatooyo oo hore.

Shaqooyinka dowladdeena badi laguma bixiyo aqoon, ammaano, mudnaan iyo tartan. Tani waa heer walba oo dowladdeena ah.

Markii uu qofka qabto kursi uu xitaa isagu ogyahay in uusan u qalmin oo aqoonteedii laheyn, kartina lagu siinin, balse beddelkeeda lagu siiyay reer ahaan, saaxiibtinimo ahaan iyo maalmo ku noolow.

Dabcan waxa ugu weyn ee uu kari karo waa inuu wax dhaco, kumana sii jirto markii uu arko qofkii isaga magacaabay oo isagna wax xadaaya. Qof xilka lagu siiyay si musuq-maasuq ah sidee loo dhihi kara waxba ha musuqin.

Sidoo kale markii aad magacowdo wasiir ama maareeye xatooyo ku suntan, sidee u rajeynaysa in shaqaalaha ama askariga ugu hooseeya uusan waxba xadi doonin.

Si ay Soomaaliya uga adkaato musuqa jeebka waa inay marka hore ka adkaato musuq-maasuqa xilalka, oo shaqooyinka muhiimka ah ee dowladda lagu bixiyaa aqoon, karti, amaano iyo mudnaan.

Qofkii si sharfan oo aqoon iyo cadaalad wadata ku yimaada kursiga ayaa dhisi kara hay’ad dowladeed oo sharfan, kana dhowrsan kara dhaca hantida umadda. Illaa ay madaxda Soomaalida joojiyaan musuqa xilalka lagama adkaan karo musuqa jeebka.

The post Maxaad ka ogtahay arrinta dhashay musuqa ‘xarkaha goostay’ ee Soomaaliya? appeared first on Caasimada Online.