Xog: DF oo deegaan fog ka soo qabatay Shiiqii taageeray Shabaab ee weeraray Xasan Sheekh

[Deeq A.]

Muqdisho (Caasimada Online) – Dowladda Soomaaliya ayaa soo xirtay Sheekh Cabdiraxmaan Axmed Rooble oo laga soo qabtay degmada Gadoon ee gobolka Galgaduud, kadib markii jeediyey khudbad uu ugu hiilinayo Khawaarijta Al-Shabaab, muuqaalka Shiiqaan ayaa baraha bulshada qabsaday maalmihii lasoo dhaafay.

Sida ay ogaatay Caasimada Online Sheekh Cabdiraxmaan ayaa muddo 3 maalmood ah ku xirnaa xabsi ku yaalla Dhuusamareeb, baaritaan kadibna waxaa loo soo gudbiyey Muqdisho.

Hey’adda NISA ayuu hadda u xiran yahay Sheekh Cabdiraxmaan oo cadeystay taageeradiisa Al-Shabaab, waxaana ku socda baaritaan culus, sida ay noo xaqiijiyeen ilo dhanka sirdoonka ah.

Wadaadkan ayaa la geeyay xarun hey’adda Nabad sugidu ku leedahay Muqdisho, waxaana wax laga waydiinayaa hadalo ku jirey muxaadaro uu dhawaan kaga soo horjeestay dagaalka dowladdu kula jirto Khawaarijta.

Wadaadkan oo sida muuqata ku adag afkaarta xagjirka ah ayaa maalmaha soo socda wajahaya Maxkamad, waxaana saraakiisha gacanta ku haya kiiskiisa aan kasoo xiganey in uu si cad u diidey, ka laabashada hadaladii qalafsanaa ee horay uu u yiri.

Dowladda ayaa muddo baadi goobeysay Sheekh Cabdiraxmaan, markii hore waa la marin habaabiyey hey’adaha ammaanka waxaana loo sheegay in masjidka uu muxaadaradaas ka jeediyey uu ku yaallo degmada Heliwaa ee Muqdisho, balse xaqiiqadu sidaas ma aheyn.

Ugu dambeyn waxaa Sheekh Cabdiraxmaan laga soo qabtay magaalo Garoon la dhaho oo 40 KM bari ka xigta caasimada Galmudug ee Dhuusamareeb, habeeno uu halkaas ku xiraa kadibna waxaa loo soo gudbiyey Muqdisho.

Sheekh Cabdiraxmaan oo la dhashay wadaadkii caanka ahaa ee dhintay Sheekh Boqol-Soon ayaa la sheegay inay biyo dhigatay afkaarta xagjirnimada waana sababta keentay in loo soo dhaadhiciyo baaritaanka adag ee NISA.

Shiiqaan ayaa si cad madaxweyne Xasan Sheekh ugu dhaliilay dagaalka uu ku qaaday Al-Shabaab, isagoo sheegay in dhiiga nimankaas uusan banaaneyn, sidoo kale ciidamada dowladda ayuu ku tilmaamay kuwo aan ‘jihaad ku jirin oo xaq darro ku dhimanaya’ taas oo hadal heyn badan ka abuurtay baraha bulshada.

The post Xog: DF oo deegaan fog ka soo qabatay Shiiqii taageeray Shabaab ee weeraray Xasan Sheekh appeared first on Caasimada Online.