Dowladda oo war kasoo saartay cabasho xooggan oo ka taagan Muqdisho

[Deeq A.]

Muqdisho (Caasimada Online) – Wasiirka Wasaaradda Beeraha iyo Waraabka XFS Maxamed Cabdi Xayir (Mareeye) ayaa ka jawaabay cabashooyin isa soo tarayay oo ka taagan magaalada Muqdisho.

Beeralayda caasimada ayaa dhawaan cabasho xooggan ka muujiyay ciidamada jooga baraha lagu baaro baabuurta sida khudaarta soo gasha magaalada Muqdisho.

Wasiirka oo ganacsatada uga cudur daaray culeyska ay kala kulmaan soo gelinta khudaarta ee caasimada ayaa waxa uu ciidamada ka dalbaday in loo fududeeyo baarista kala duwan ay maraan baabuurta sida khudaarta, si looga baaqsado khasaaraha ay ka cawdeen ganacsatada, maadaama ay ku jiraan dalagyo aan muddo badan ooli karin banaanka.

“Beeraleyda Soomaaliyeed waxaan u sheegayaa in wasaaradda ay u taagan tahay inay caawiso beeraleyda, in ay u sameyso waxkasta oo dhiiri-galin u noqonayo sidii wax soo saarkoodu u fiicnaan lahaa, masuuliyadaas ayaa u taaganahay,” ayuu yiri Wasiir Maareeye.

Waxa uu intaas kusii daray “Ganacsatada iyo beeraleyda dhankooda waa inay u dulqaatan ciidanka har iyo habeen u taagan sugida amniga caasimada, si looga hortago dhagaraha argagixisada. Ciidankuna waa inay u fududeeyaan, iyada oo lagu xad-gudbeen habka sugida amniga.”

Dhawaan ayay ahayad markii ganacsatada caasimada, gaar ahaan kuwa khudaarta ay cabasho xooggan ka muujiyeen ciidanka ku sugan baraha lagu baaro gadiidka, taasi oo ay sheegeen in muddo lagu hayo halkaasi, islamarkana ay inta badan ka halabaan dalagyadii ay beeraha kasoo gureen.

Arrintan ayuu khasaare horleh kasoo gaaray ganacsatada, waxayna hadda wasaaradda beeraha iyo waraabka ay ballan-qaaday inay si dhow ugala shaqeyn doonto fududeynta sidii dalagyadooda ay u gaarsiin lahaayeen suuqyada caasimada, maadaama ay kaalin weyn ku leeyihiin wax soo saarka dalka.

The post Dowladda oo war kasoo saartay cabasho xooggan oo ka taagan Muqdisho appeared first on Caasimada Online.