Sawirro: Booliska Cadaado oo soo bandhigay rag badan oo loo haysto arrin xasaasi ah

[Deeq A.]

Cadaado (Caasimada Online) – Booliska Degmada Cadaado ayaa gacanta ku soo dhigay ku dhawaad 10 qof oo la sheegay inay masoomayaal yihiin.

Raggaan ayaa lagu soo qabtay howlgallo ay ciidamada booliska degmada Cadaado ka fuliyeen duleedka degmada Cadaado ee Gobolka Galgaduud.

Taliyaha saldhigga booliska Cadaado L/Xidigle Xuseen Axmed Xaashi ayaa sheegay in ragaan lasoo qabtay ay muddo kudaba jireen.

Taliyaha ayaa sheegay in maanta ay ku guuleysteen soo qabashada raggaan ku eedeysan inay masoomayaal yihiin.

Taliyaha oo faahfaahin ka bixiyey arrinta lagu soo qabtay ragaan 10-ka gaaraaya ayaa sheegay in waxyaabaha maanka-dooriya ay isticmaalayeen maalin cad, iyadoo lagu jiro bisha barakeysan ee Ramadaan.

Ragaan ayaa laga soo qabtay deegaanka Bali-higis oo hoos taga degmada Cadaado, halkaas oo waxyaabaha maanka-dooriya ay ku isticmaalayeen.

Ugu dambeyntii Taliyaha ayaa digniin culus u diray dadka falalka noocaan ah ku guda jira, asagoo sheegay in cidii lagu qabto tilaabo adag ay ka qaadi doonaan.

Inta badan gobollada dalka iyo caasimadda Muqdisho inta lagu guda jiro bishaan barakeysan ee Ramadaan waxaa lagala dagaalamaa dadka masoomayaasha ah, maadaama dadka Soomaaliyeed ay dhamaantood muslimiin yihiin.

The post Sawirro: Booliska Cadaado oo soo bandhigay rag badan oo loo haysto arrin xasaasi ah appeared first on Caasimada Online.