Dhalinyaradii ku eedaysnaa burcad-badeedda ee lagu qabtay Markabkii MV Ruen oo maanta la geeyay dalka Hindiya

[Deeq A.]

Dhalinyaradii Soomaaliyeed ee lagu sheegay burcad-badeedda oo ciidanka badda Hindiya ay ku qabteen markabka MV Ruen ayaa maanta oo Sabti ah la geeyay dalka Hindiya.

Dhalinyarada maxaabiista ah ee ku eedaysan burcad-badeedda ayaa lagu wareejiyay ciidanka Booliska Mumbai oo la sheegay in ay maxkamadda gayn doonaan.

Mas’uuliyiin ka tirsan dowladda Hindiya ayaa laga soo xigtay in dhalinyaradaasi wajahayaan eedeymo la xiriira burcad badeednimo, afduub iyo in ay iska caabin kala hortageen ciidanka badda Hindiya oo ay rasaas ku fureen , diyaarad nooca aan duuliyaha lahayn ee wax sawirtana ka soo rideen.

Kooxdan oo ka kooban 35 nin , oo markii la qabanayay hubaysnaa ayaa la sheegay in ay Booliska Mumbai dhowaan muddeyn doonaan xilliga ay billaabanayso dacwadooda oo sidoo kale lala socod siin doono safaaradda ay Soomaaliya ku leedahay Hindiya.

PUNTLAND POST

The post Dhalinyaradii ku eedaysnaa burcad-badeedda ee lagu qabtay Markabkii MV Ruen oo maanta la geeyay dalka Hindiya appeared first on Puntland Post.