Golaha Ammaanka Qaramada Midoobey oo loo gudbiyay qaraar mamnuucaya in Nukliyeer la geeyo Hawada sare

[Deeq A.]

Golaha Ammaanka Qaramada Midoobey ayaa Todobaadkan loo gudbiyay qaraar qabyo ah oo ka mamnuucaya dalalka Caalamka in ay hubka Nukliyeerka geeyaan Hawada sare.

Maraykanka iyo Japan ayaa Isniintii u gudbiyey golaha ammaanka ee Qaramada Midoobey hindisaha qaraar qabyo ah, kaas oo ku saabsan in dalalka caalamku ay u hoggaansamaan heshiiska mamnuucaya in hubka nukliyeerka la geeyo hawada sare, fariintaas oo u muuqata inay ku socoto dalka Ruushka.

Washington ayaa aaminsan in dalka Ruushku uu horumarinayo qorshe uu doonayo inuu hawada sare ku geeyo gantaallada xambaara hubka nukliyeerka, taas oo haddii ay qarxaan, khalkhal gelin karta dhammaan dayax-gacmeedada kala duwan ee fududeeya isgaadhsiinta kala duwan, oo ay ku jirto tan milaterigu.

Ruushka oo qayb ka ahaa heshiis la saxiixay sannadkii 1967-kii kaas oo mamnuucayey in hawada sare la geeyo hubka nukliyeerka ayaa hore u sheegay inay ka soo horjeedaan in hubka nukliyeerka la geeyo hawada sare.

Qaraarkan qabyada ah waxaa soo wada jeediyey, dalka keliya ee isticmaalay hubka nukliyeerka oo ah Maraykanka, iyo dalka keliya ee loo isticmaalay hubka nukliyeerka ah oo ah Japan, waxayna dalalka caalamka ugu baaqeen inay mamnuucaan in hub la geeyo hawada sare.

PUNTLAND POST

The post Golaha Ammaanka Qaramada Midoobey oo loo gudbiyay qaraar mamnuucaya in Nukliyeer la geeyo Hawada sare appeared first on Puntland Post.