Darawal Soomaali ah oo lagu dilay weerar gaadmo ah oo ka dhacay dalka Koonfurta Suudaan

[Deeq A.]

Muwaadin Soomaali ah oo Darawalnimada kaga shaqeynsan jiray dalka Koonfurta Suudaan, ayaa lagu dilay weerar gaadmo ah oo ay kooxo hubeysan ku qaadeen gobolka Jonglei ee  Koonfurta  Sudan.

Elizabeth Nyadak John, oo ah wasiirka  warfaafinta ee gobolka, ayaa sheegtay in muwaadinka Soomaaliga ah ee la dilay uu kamid ahaa kolonyo gaadiid ah oo raashin gargaar ah u waday degmada Uror oo ku taalla Gobolka Jonglei.

 “Kolonyo 10 baabuur ah ayaa ka baxay caasimadda gobolka Bor si ay raashin gargaar ah u gaarsiiyaan waqooyiga gobolka. Nasiib darro, 10-kii baabuur ee ugu dambeeyay ayaa lagu bartilmaameedsaday Duk Panyang Payam oo ay weerareen kooxihii weerarka geystay, darawalkiina waxaa lagu toogtay isla goobta ,” ayay tidhi Elizabeth Nyadak John.

Wasiir Nyadak ayaa dhaleeceeysay dhacdadan, waxayna sheegtay in weerarka uu ahaa mid qorsheysan oo lagu doonayay in lagu hor istaago raashin la gaadhsiin lahaa dadka tabaalaysan.

“Gawaarida xamuulka ah lama dhicin sida xogta aan ku hayno. Waxay beegsadeen gaarigii ugu dambeeyay ee siday raashinka WFP iyagoo rasaas ku furay gaariga kadibna madaxa ayay ka toogteen darawalkii, ayay hadalkeeda ku dartay.

“Sababta waxaan uga shakisannahay inay tahay in aysan doonayn dadkayaga soo laabtay ee ka soo laabtay Suudaan iyo Itoobiya inay helaan cunto,” ayay raacisay hadalkeeda.

Guddoomiyaha gobolka Duk, Peter Latjor Chuol ayaa sidoo kale xaqiijiyay dhacdadan, wuxuuna sheegay in aaan wali la aaasin meydka darawalkii la dilay.

Soomaali badan ayaa dalka Koonfurta Suudaan kaga shaqeysta shaqooyinka darawalnimada gaadiidka xamuulka qaada. Weli safaaraadda Soomaaliya ee Koonfurta Suudaan war rasmi ah kamasoo saarin dilka muwaadinka Soomaaliyeed.

Source