Maxaad ka ogtahay askariga maanta la xukumay ee isla markiiba la toogtay?

[Deeq A.]

Baydhaba (Caasimada Online) – Maxkamadda ciidamada qalabka sida, qaybteeda 60-aad ayaa maanta xukun dil toogasho ah ku ridday askari horay dil ugu gaystay askari kale.

Xukunka ayaa markii dhacay, kadib horay tiirka laga geeyay Cabdiraxiin Cismaan oo ahaa askariga horay dilka u gaystay, kaas oo lagu qisaasay fagaare ku yaalla Baydhaba.

Maxkamadda ayaa sheegtay in askariga maanta la toogtay uu horay u dilay Marxuum Ibraahim Aadan Salaad Wiirow oo isna ka tirsanaa Ciidanka daraawiishta Koofur Galbeed, dilkaas oo ka dhacay degmada Diinsoor ee gobolka Baay.

Fagaaraha lagu toogtay ninkan ayaa waxaa ku sugnaa saraakiil ka tirsan Maxkamadda Ciidamada iyo ehellada labada dhinac, kuwaas oo goob joog u ahaa fulinta xukunka.

Reer Baydhaba ayaa aad usoo dhaweeyay tallaabada ay maanta qaaday maxkamadda ciidamada, maadaama si deg-deg ah loo toogtay gacan ku dhiiglihii dilka gaystay.

Koonfur Galbeed ayaa horay sidaan oo kale u dadajisay toogashada shaqsiyaad dilal kala duwan ka gaystay deegaanada maamulkaasi, taas oo aad loogu boggaadiyay.

Si kastaba, Maalmihii dmabe Maxkamadda Ciidamada Qalabka Sida ayaa kordhisay fulinta xukunada  toogashada ah, kuwaas oo lagu riday shaqsiyaad kala duwan oo dilal gaystay.

The post Maxaad ka ogtahay askariga maanta la xukumay ee isla markiiba la toogtay? appeared first on Caasimada Online.