Dadaallada caalamiga ah oo gargaar lagu gaadhsiinayo Gaza oo sii xoogeysanaya

[Deeq A.]

Waxaa Arbacadi shalay sii xoogeystay dadaalka loogu jiro sidii Marinka Gaza loo gelin lahaa gargaarka bani’aadannimo ee sida aadka ah ay ugu baahanyihiin dadka gaajada darteed dhimanaya ee reer Gaza.

Midowga Yurub ayaa kordhiyay cadaadiska uu ku saarayo Israa’iil in ay qaaddo xayiraadaha gargaarka bani’aadannimo. Dalalka reer Yurub ayaa isku dayaya in ay abuuraan dariiq sii maraya badda oo kasoo billaabanaya Qubrus kuna dhammaanaya Gaza, kaas oo lasoo marin doono gargaar bani’aadannimo.

Wasiirka Arrimaha Dibadda Britain David Cameron ayaa isna Arbacadi sheegay, in xulufada Israa’iil ay sii luminayaan dul-qaadka.

Koofur Africa oo hore Israa’iil uga dacweysay Maxkamadda Caalamiga ah ee Caddaaladda kuna eedeysay xasuuq ka dhan ah dadka Gaza, ayaa Arbacadi ka codsatay Maxkamaddaasi in ku amarto Israa’iil in Gaza la geliyo gargaar bani’aadannimo si looga hortago macluul iyo gaajo.

Qaramada Midoobay ayaa ka digtay in ugu yaraan 576,000 oo qof oo ku nool Gaza, oo ah rubuc ka mid ah dadka ku nool Marinka Gaza ay qarka u saaran yihiin macluul.

Source