Xog: Sheekh SHARIIF iyo Farmaajo oo dhisaya isbaheysi culus oo ka dhan ah Xasan

[Deeq A.]

Muqdisho (Caasimada Online) – Xogo dheeraad ah ay kasoo baxaya kulan xasaasi ah oo xalay magaalada Muqdisho ku yeesheen madaxweyneyaashii hore ee Soomaaliya Shariif Sheekh Axmed iyo Maxamed Cabdullaahi Farmaajo.

Sida ay ogaatay Caasimada Online, kulankii xalay ayaa lagu karkariyay qorshaha isbaheys siyaasadeed cusub oo looga hortagayo madaxweyne Xasan Sheekh, kaasi oo qorshihiisu muddo soo socday.

Wada-hadallada labada madaxweyne oo sidoo kale muddo soo socday ayaa qorshihiisu ahaa in la ballaariyo isbahaysiga, islamarkaana lagu soo qanciyo siyaasiyiinta kale ee ka aragtida duwan dowladda, si uu saameyn weyn u yeesho isbaheysiga ka dhanka ah Xasan.

Xogaha aan ka helayno qorshahaan ayaa sheegaya in Sheekh Shariif uu u bandhigay Xasan Cali Kheyre iyo Cabdiraxmaan Cabdishakuur Warsame sidii ay isbaheysiga qayb uga noqon lahaayeen.

Labada nin ayaa lasoo warinayaa in ay ka gaabsadeen isbaheysigaan, iyada oo sababta u weyn lagu sheegay inay tahay khilaafka kala dhaxeeya madaxweyne hore ee Farmaajo iyo in ay diidan yihiin wax ku darsigiisa.

Si kastaba, Dhaq-dhaqaaqyada siyaasadda ee durba soo ifbaxaya ayaa u muuqda in dhacdooyinkii 6-dii sano ee la soo dhaafay ay qaabeyn doonaan hannaanka ay mucaardka dowladda iskula fal gali doonaan.

Siyaasada Soomaaliya oo kala barkii muddo xileedka joogta ayaa u muuqata in uu bilowday loolankii doorashooyinka 2026-ka.

The post Xog: Sheekh SHARIIF iyo Farmaajo oo dhisaya isbaheysi culus oo ka dhan ah Xasan appeared first on Caasimada Online.