DF oo maanta tallaabo weyn u qaaday nabadda Soomaaliya + Sawirro

[Deeq A.]

Muqdisho (Caasimada Online) – Ra’iisul Wasaaraha Soomaaliya Xamza Cabdi Barre ayaa maanta magaalada Muqdisho ka daah-furay Madaadii’da Nabadda ee Soomaaliya.

Ra’iisul Wasaare Xamza ayaa munaasabadda ka sheegay in adduunka ay ka jirto wal-wal la xiriira sii jiritaanka nabadda, taasi oo muhiim ka dhigaysa in la helo xeerar sal adag oo lagu xakameynayo cid walba oo wax yeelaysa nabadda adduunka.

Waxa uu xusay in Soomaaliya ay ku socoto jidkii nabadda, horumarka iyo dib-u-soo kabashada, isla markaana ay muhiim tahay in la kobciyo hey’adaha dowliga ah, si bulshada loo gaarsiiyo adeegyada ay u baahan yihiin ee xoojinaya nabadda.

Sidoo kale dagaalka lagula jiro kooxda Al-Shabaab ee ka soconaya dalka ayuu sheegay in ay yihiin kuwo lagu raadinayo nabadda, isaga oo baaq cod dheer ah u direy dhallinyarada weli jirtay dhanka kooxda.

Wuxuu ugu baaqay ra’iisul wasaaraha dhalinta ay marin habaabiyeen argagixsadu in ay ku soo laabtaan jidka saxda ah, kana tanaasulaan afkaarta gurracan ee lagu daadinayo dhiigga ummadda Soomaaliyeed.

Sidoo kale wuxuu ugu baaqay qeybaha kala duwan ee bulshada Soomaaliyeed inay ka shaqeeyaan nabadda iyo isu soo dhaweynta bulshada, kana fogaadaan wax walba oo dhaawaci kara nabadda ummadda.

Ra’iisul Wasaaraha ayaa ugu dambeyntiina waxa uu caddeeyay in dowladda Soomaaliya ay ka go’an tahay in dariskeeda ay kula noolaato nabad, dhankeedana aysan aqbali doonin in lagu soo xad-gudbo Qarannimada iyo jiritaanka Jamhuuriyadda Federaalka Soomaaliya.

The post DF oo maanta tallaabo weyn u qaaday nabadda Soomaaliya + Sawirro appeared first on Caasimada Online.