Nin dab isku qabadsiiyey afaafka hore ee safaaradda Israa’iil ee Washington

[Deeq A.]

Sida ay mas’uuliyiintu sheegeen nin ayaa xalay dab isku qabadsiiyay banaanka Safaaradda Israa’iil ay ku leedahay magaaladan Washington.

Ninkan oo aan weli magaciisa la shaacin ayaa shaqaalaha gurmadka caafimaadka waxay ula carareen cisbitaal Washington ku yaalla, ka dib markii ciidamo ka mid ah kuwa Secret Service ee ilaaliyaha madaxda iyo diplomaasiyiinta ay damiyeen dabkii uu isqabadsiiyay.

War kooban oo waaxda dab demiska ee magaaladan Washington ay soo dhigeen internetka ayey ku sheegeen in xaaladda ninkaasi ay halis tahay. Ciidamada Booliska ee magaaladan Washington iyo kuwa ilaalada madaxda iyo diplomaasiyiinta ayaa baadhis ku haya dhacdadan.

Safaaradda Israa’iil ayaa xilliyadan dambeba bar tilmaameed u aheyd dibad baxyo joogto ah oo lagaga soo horjeedo dagaalka ba’an ay Israa’iil ka wado Qaza.

Ciidamada Israa’iil ayaa duulaan ku qaaday Qaza, iyagoo inta baddan magaaladan burburiyay, iyagoo dilay sida saraakiisha caafimaadka ee Falastiiniyiintu ay sheegeen dad ku dhow 30,000 oo qof.

Source