Xog: Madaxweyne Xasan oo baarlamanka ugu yeeray shir xasaasi ah berri + Ujeedka

[Deeq A.]

Muqdisho (Caasimada Online) – Madaxweynaha Soomaaliya Mudane Xasan Sheekh Maxamuud ayaa mar kale kulan aan caadi ahayn isugu yeeray xildhibaannada labada Gole ee Baarlamaanka, kaas oo lagu wado inuu berri ka dhaco hoolka xarunta Villa Hargeysa.

Guddoomiyaha Golaha Shacabka, Sheekh Aadan Madoobe oo kulankii maanta guddoomiyay ayaa xildhibaannada la wadaagay codsiga madaxweynaha ee ah inuu berri hor imaanayo

“Arinbaa hadda soo dhacday oo uu madaxweynaha JFS soo qoray wuxuu codsaday shir aan caadi ahayn oo ku saabsan xaaladda uu dalka maraayo” ayuu yiri Sheekh Aadan Madoobe.

Sidoo kale wuxuu kusii daray “Dastuurkeena wuxuu qabaa qodobkiisa 66-aad farqaddiisa 4-aad xarafkiisa A iyo qodobada 71-aad iyo 90-aad waxay qabaan in madaxweynaha uu isugu yeeri karo baarlamaanka waqti alaala waqtigii loo baahdo”.

Aadan Madoobe ayaa ugu baaqay xildhibaannada inay soo wada xaadiraan kulankaasi, si ay u dhageystaan warbxiinta uu wado madaxweyne Xasan Sheekh Maxamuud.

“Sidaas daraadeed maadaama ay arin dastuuri ah tahay waqtiga lagu jirana aad dareemi kartiin, ajendaha wa lasoo diri doonaa guddiga ayaan dib ugu celinayaa” ayuu raaciyay.

Guddoomiyaha ayaa xusay in madaxweynaha uu ka hadli doono xaaladaha soo kordhay, gaar ahaan safarkiisii dalka Itoobiya iyo wixii uu kala soo kulmay.

Berri aan soo diyaar garowno dhammaanteen si aan u dhagesano warbixinta madaxweynaha safarkii uu ku maqnaa iyo waxa uu la kulmay waad ogtihiin” ayuu yiri.

Waa markii labaad oo muddo 48 maalmood ah oo uu madaxweynuhu hortegayo Baarlamaanka Soomaaliyeed, isaga oo horay ula wadaagay xadgdubka Itoobiya.

The post Xog: Madaxweyne Xasan oo baarlamanka ugu yeeray shir xasaasi ah berri + Ujeedka appeared first on Caasimada Online.