Muwaadin reer Somaliland ah oo Xamar Meydkiisa laga helay iyo tuhunno soo baxay

[Deeq A.]

Muwaadin reer Somaliland ah oo Xamar Meydkiisa laga Helay iyo Tuhunno soo Baxay

Hargeysa(Qaran news)- Agaasimaha Guud ee Wasaaradda Warfaafinta, Dhaqanka iyo Wacyigelinta Somaliland Mustafe Cabdi Ciise ( Shiine) ayaa sheegay in Cabdinaasir Muuse Dahable oo ahaa wiil dhallinyaro oo u dhashay Somaliland meydkiisa laga helay Muqdisho iyadoo la weriyay in nabaro ka muuqdaan.

Sidaasna waxa uu ku sheegay qoraal uu Facebook ku daabacay oo u dhignaa sidan:-

“Cabdinaasir Muuse Dahable, ayaa la soo sheegay in Maydkiisa la helay isagoo ay ka muuqdaan nabaro muujinaaya in la ceejiyay. Sida uu soo weriyay Saxafi Axmed Cabdiraxmaan Hello.

Sida warar kale ay sheegayaan waxa tan iyo intii uu soo baxay warka ku saabsan in Somaliland ay hawadeedii la wareegtay la saaray culays shaqaalihii hagaayay diyaaradaha ee u dhashay Somaliland, kuwaasi oo xitaa maalmihii ugu danbeeyay ka baqanaayay inay eheladooda la soo xidhiidhaan.

Sida ay xaqiijiyeen asxaab ay isku lod ahaayeen muwaadiniinta Somaliland ee leh xirfada sare ee hagida diyaaradaha waxa xubno la xidhiidhay ay qoraal ahaan ugu soo sheegeen in ay ka daayaan wicitaanka.”

Qaran News