Qabyadii Sharcigu Way Innaga Dhamaatay waa in Doorashadii uun la Galaa” Murrashax Cirro

[Deeq A.]

“Qabyadii Sharcigu way Innaga Dhammaatay waa in Doorashadii uun la Galaa” Murrashax Cirro

Hargeysa(Qaran news)- Murrashaxa madaxweynaha ee xisbiga WADDANI Md. Cabdiraxmaan Maxamed Cabdilaahi (Cirro) ayaa goleyaasha Wakiillada iyo Guurtidda uga mahadceliyay xeerarkii doorashada ee ay ku ansixiyeen aqlabiyada.

Murrashax Cirro oo u warramay VOA-da ayaa sheegay in qabyooyinkii sharcigu ay Somaliland ka dhammaadeen imikana loo baahan yahay in loo diyaar garoobo doorashooyinka isa saarka ah ee madaxweynaha iyo ururrada siyaasadda ee muddaysan inay qabsoomaan 13ka November 2024ka.

“Qabyada kaliya ee hadhay waa in komishanku soo saaraan liiskii u dambeeyay ee cod bixiyeyaasha iyo jidwalkii doorashooyinka, iyaguna waxa ay sheegeen marka xeerka doorashada la ansixiyo inay soo saari doonaan,” ayuu yidhi Murrashax Cabdiraxmaan Cirro.

Waxa uu sheegay mar haddii labadii gole ay ku ansixiyeen labadii xeer saddex meeloodow laba iyo in ka badan, in madaxweynahana looga fadhiyo oo kaliya inuu dhaqan geliyo.

Murrashax Cirro oo la weydiiyay ururrada cabanaya, wuxuu sheegay in ururradu yihiin qaar sharciya oo ku jira doorashada, haseyeeshee wuxuu ku dooday in qabyadii dhinaca shuruucdu soo gabogabowday.

Qaran News