PUNTLAND oo nolosha ku qabatay ajaanib ka tirsan Daacish iyo Al-Shabaab

[Deeq A.]

Boosaaso (Caasimada Online) – Taliyaha Qaybta Booliska gobolka Bari Col. Cabdiqaadir Jaamac Dirir oo wareysi gaar ah siiyay laanta afka Soomaaliga ah ee VOA ayaa ka hadlay howlgallo ay ciidamada amniga Puntland ka wadaan Boosaaso iyo deegaanada u dhow.

Taliyaha ayaa sheegay in howlgalladan oo socdo muddo laba todobaad ah lagu xaqiijinayo amniga, isla markaana lagu soo qabtay qaraxyo iyo dadkii ku lugta lagta lahaa.

“Howlgalku waxa uu socday muddo laba isbuuc ku dhow, waana sii socon doonaa, ciidamaduna waxay ku qabteen shaqooyin badan dad, qalab iyo qaraxyo” ayuu yiri.

Sidoo kale wuxuu tilmaamay in howlgalladan lagu soo qabtay illaa 13 qof oo ka tirsan Al-Shabaab, ayna ku jiraan ajaaniib u kala dhashay dalalka Suuriya iyo Marooko.

11 kamid ah xubnaha la qabtay ayaa ah Al-Shabaab, halka 2 kale oo ajnabi ah ay ka tirsan yihiin kooxda Daacish, sida uu shaaciyay taliyaha qaybta booliska ee gobolka Bari.

“Waxaa gacanta lagu soo dhigay 13 qof oo kamid ah argagaxisada oo ay kua jiraan 2 qof oo ajnabi ah nin la yiraahdo Maxamed Ibnu Maxamed Axmed oo u dhashay Suuriya iyo nin Marookaan ah oo a yiraahdo Xasan Maxamed Xuseen” ayuu mar kale yiri taliyuhu.

Waxaa kale oo uu sii raaciyay “Labada nin ee ajaaniibta ah waxa ay ka tirsan yihiin Daacish, inta kale iyagu Al-Shabaab weeye”.

Dhanka kale, waxa uu hoosta ka xariiqay inay xiraam 25 qof oo kale oo tuhmanayaal ah, kuwaas oo uu tilmaamay in haatan baaris ku haayaan laamaha ammaanka ee Puntland.

Boosaaso ayaa waxaa muddooyinkii u dambeeyay ka socday howlgallo amni xaqiijin ah iyo kuwa kale oo lagu raafayay dadka Oromada ah ee ku sugan gudaha magaaladaasi.

The post PUNTLAND oo nolosha ku qabatay ajaanib ka tirsan Daacish iyo Al-Shabaab appeared first on Caasimada Online.