Xasan Sheekh: Jubbaland waa meesha Maska madaxiisa uu yaallo

[Deeq A.]

Kismaayo (Caasimada Online) – Madaxweynaha Soomaaliya, Mudane Xasan Sheekh Maxamuud iyo madaxweynaha Jubbaland, Axmed Madoobe ayaa maanta si wadajir ah shir jaraa’id ugu qabtay magaalo xeebeedka Kismaayo oo uu booqasho ku joogo Xasan Sheekh.

Madaxweynaha oo ka hadlay goobta ayaa faahfaahin ka bixiyay wada-hadallo uu la yeeshay madaxda sare ee Jubbaland, kuwaas oo soo bilowday shalay, illaa maanta.

Xasan Sheekh Maxamuud ayaa sheegay in Axmed Madoobe uu kala hadlay arrimo ay ugu muhiimsan yihiin kuwa hortabinta u leh dowladda iyo shacabka Soomaaliyeed.

“Sida uu madaxweynuhu sheegay shalay, xalay, illaa saaka ayaan shirar muhiim ah galnay maalin walba waxbaa hortabinta leh maanta baahiyaha hortabinta leh in laga shaqeeyo ayaa uga hadalnay” ayuu yiri madaxweyne Xasan Sheekh Maxamuud.

Sidoo kale wuxuu sii raaciyay “Dalka Soomaaliya meel dheer ayuu ka yimid, haddana meel ayuu marayaa, meel kalena wuu u socdaa, rajadana aad iyo aad ayay u fiican tahay”.

Labada mas’uul ayaa sidoo kale isla soo hadal qaaday arrimo ku aadan dagaalka Al-Shabaab, ayada oo madaxweyne Xasan Sheekh uu shaaca ka qaaday in Jubbaland ay tahay meesha uu yaallo maska madaxiisa oo kula jeedo kooxda Al-Shabaab oo ku xoogan maamulkaasi.

“Sida uu madaxweynuhuu tilmaamay Jubbaland waa meesha maska madaxiisa uu yaallo oo in shaqo badan oo aad iyo aad u adag laga qabto u baahan” ayuu yiri.

Waxaa kale oo uu kusii daray in haatan ay socdaan howlgallada deegaana badana lagu xoreeyay, balse ay hakad geliyeen roobabkii ka da’ay gobolladaasi.

Wadahadalkan ayaa kusoo aadayo, xilli xasaasi ah isla markaana ay taagan tahay dood weyn oo ka dhalatay wax ka beddelka dastuurka KMG ka ah ee dalka.

The post Xasan Sheekh: Jubbaland waa meesha Maska madaxiisa uu yaallo appeared first on Caasimada Online.