Toogasho lagu laayay saraakiil Imaaraad ah oo caawa ka dhacday Xerada Gen. Gordan ee Muqdisho

[Deeq A.]

Wararka dheeraad ah ayaa ka soo baxaya toogasho caawa ka dhacday Xerada Jen. Gordon oo ay saldhig ku lahaayeen Saraakiisha Tababarka Ciidanka Imaaraadka ee tababara Ciidanka loo yaqaan Boolis Milataare.

Illaa shan Sarkaal ayaa toogashada ku geeriyooday, halka laba kale ay ku dhaawacmeen. Wararka ayaa sheegaya in Sarkaalka ugu sareeya Saraakiisha Imaaraadka oo lagu magacaabo Col. Maxamed Mubaarak uu ku geeriyooday weerarka.

Madaxweynaha Soomaaliya Xasan Sheekh ayaa booqday Isbitaalka Erdogan oo la dhigay dhaawaca Saraakiisha Imaaraadka.

Madaxweyne Xasan Sheekh ayaa si adag u cambaareeyay weerarka waxaana uu dowladda Imaaraadka Carabta uga tacsiyeeyay Saraakiisha kaga dhintay weerarka oo uu sheegay in ay ka shaqaynayeen dib u dhiska Ciidamada Soomaaliya.

Ilo wareedyo laga helay gudaha xerada Jen. Gordon ayaa sheegaya in askariga dilka geystay uu ka mid ahaa Ciidamada amniga Xerada gacanta ku haya, kaasoo marki dambe la toogtay, wuxuu ka mid ahaa Guutada 28aad ee lagu soo tababaray dalka Uganda oo ahaa ciidankii u dambeeyay ee lagu soo tababaray Uganda.

PUNTLAND POST

The post Toogasho lagu laayay saraakiil Imaaraad ah oo caawa ka dhacday Xerada Gen. Gordan ee Muqdisho appeared first on Puntland Post.