Tirada ciidanka ATMIS ee laga saaray dalka oo la shaaciyay

[Deeq A.]

Muqdisho (Caasimada Online) – Taliska guud ee howlgalka ATMIS oo soo saaray warbixin cusub ayaa shaaca ka qaaday in Soomaaliya ay ka saareen illaa 5,000 oo askari, kuwaas oo dib ugu laabtay dalalkooda, kadib markii ay dhammeysteen muddo xileedkooda.

ATMIS ayaa sheegtay in ciidamadaas dalka laga saaray intii lagu guda jiray wajigii koowaad iyo labaad ee ciidamada Midowga Afrika ee howlgallada u jooga gudaha Soomaaliya.

Sidoo kale waxa ay intaasi ku dartay in ay wareejisay 13 xero oo ay hadda maamulaan ciidamada dowladda Soomaaliya, taas oo qayb ka ah qorshaha kala guurka.

Talisku waxa uu hoosta ka xariiqay inay dajin doonaan istaraatiijiyada ugu dambeysa ee howlgallada ka dhanka ah kooxda Al Shabaab ee weli ka socda Soomaaliya.

Waxaa kale la diyaarin doonaan  qorshaha wejiga xiga ee dhimista 4000 oo askari oo dheeri ah illaa iyo bisha June, sida lagu sheegay warbixinta.

Danjire Souef oo ah oo ah ergayga Midowga Afrika u qaabilsan Soomaaliya ahna madaxa ATMIS, ayaa sheegay inay rajeyneynayaan in wejiga saddexaad ee dhimista ciidamadooda uu  si guul ah ku soo dhammaan doono, si loo dhameystiro qorshaha bixitaankooda.

Danjiraha ayaa ugu baaqay taliyeyaasha Ciidamada ATMIS inay si dhow ula shaqeeyaan Ciidamada Ammaanka Soomaaliya, si loo sugo ammaanka inta lagu jiro xilliga kala guurka.

Dowladda federaalka ayaa mar hore u diyaar garowday inay hanato amniga dalka, maadaama la dhisay ciidamada Xoogga dalka oo hadda la dagaalama Al-Shabaab.

The post Tirada ciidanka ATMIS ee laga saaray dalka oo la shaaciyay appeared first on Caasimada Online.