Farmaajo iyo Shariif oo bilaabay qorshe culus ka hor gogosha Garoowe – Xog

[Deeq A.]

Garoowe (Caasimada Online) – Sidaan hore u baahinay intii Garoowe loo joogay cameelo-saarka Saciid Deni ma dhicin kulan gaar ah oo dhex-maray madaxweynaha Xasan Sheekh iyo hoggaamiyaha Puntland Saciid Deni.

Labada nin ayaa mid walba ka gaabsanaayay in la furo waxyaabaha la xiriira khilaafkooda, si aan loo jiirin mowduucii loo tegay magaalada Garoowe.

Dhanka madaxweyne Xasan Sheekh waxaa kale oo la fahamsanaa in uusan rabin inuu galo shir gaar ah isaga oo ilaalinaya dareenka ra’iisul wasaarihiisa Xamza Cabdi Barre.

Hadda inta aan la gaarin shirka magaalada Garoowe loo madlan yahay, labadii madaxweyne ee hore Shariif Sheekh Axmed iyo Maxamed Cabdullaahi Farmaajo oo raadinaya dhibco siyaasi ah, sidoo kalena raba in shirka Garoowe lagu dabro xawaaraha uu ku socda Xasan Sheekh Maxamuud ayaa bilaabay qorshe cusub.

Farmaajo iyo Shariif ayaa raadinaya in shirkaasi uu qabsoomo, iyada oo Xasan Sheekh iyo Saciid Deni uusan khilaaf shaqsi ah dhex oolin, kaasi oo haddii uu sii jiro keenaya marwalba in mowduucyada ay wadaan laga muhiimsanaado.

Sidoo kale waxay bilaabeen inay diirada saaran in khilaafkan hoos loo dhigo, iyaga oo la hadlay madaxweyne Xasan Sheekh iyo Saciid Deni labadaba, islamarkaana weydiistay in arrimaha gaarka ah ee labada nin ka dhaxeeyay tan iyo magacaabistii kursiga ra’iisul wasaaraha inay dhex-dhexaadin ka sameeyaan.

Madaxweyne Xasan iyo Deni ayaa sidoo kale lasoo warinaya inay labaduba soo dhaweeyeen oo ay aqbaleen wada-hadalka ay garwadeenka ka yihiin labadii madaxweyne ee hore Maxamed Cabdullaahi Farmaajo iyo Shariif Sheekh Axmed.

Farmaajo iyo Shariif ayaa lagu wadaa in asbuucyada soo aadan ay tagi doonaan magaalada Garoowe, si ay wada-hadallada u bilaaban.

Madaxweyne Xasan Sheekh oo inta badan lagu yaqaano in uusan diidin wada-hadallada ayaa dhinaca kale la fahamsan yahay inuu dhawaan qaadi doono tallaabooyin la xiriira arrimaha dhameystirka dastuurka, taasi oo haddey dhacdana aan la ogeyn sida ay wada-hadalladaan iyo shirka Garoowe-ba u qabsoomi karaan.

Madaxweyne Xasan iyo kooxdiisa waxay aaminsan yihiin in iyaga iyo Saciid Deni waxa ay isku hayaan inay yihiin arrimo shaqsi ah, sidaas awgeed uma badna inay waqti galinayaan in arrimaha qaar dartiisa loo xayiro, si gaar ah howsha dhameystirka dastuurka, tii oo dhinaca kale la xasuusto waxyaabihii waaweyna ee u hirgalay intii Saciid Deni carada ku maqnaa.

Dad badan waxay is-weydiinayaan labada nin ee Maxamed Cabdullaahi Farmaajo iyo Shariif Sheekh Axmed ma ku guuleysan karaan dhex-dhexaadintaan.

Waxayse taasi ku xiran tahay hadba sida ay labada dhinac tanaasul u muujiyaan, sida ay iyaga naftooda waa Shariif iyo Farmaajo uga fogaadaan inay isku milaan dhibco raadintooda siyaasadeed iyo dhayida boogaha khilaafka.

Iyada oo dhinaca kale la filan karo inay wax walba istaagaan haddii uu Saciid Deni markale miiska keeno doodda kursiga ra’iisul wasaaraha, maadaama uu madaxweyne Xasan Sheekh uu weli la dhacsan yahay ra’iisul wasaare Xamza Cabdi Barre.

The post Farmaajo iyo Shariif oo bilaabay qorshe culus ka hor gogosha Garoowe – Xog appeared first on Caasimada Online.