Soomaaliya oo dalbatay $1.6 bilyan oo deg-deg ah + Sababta

[Deeq A.]

Muqdisho (Caasimada Online) – Guddoomiyaha Hay’adda Maareynya Musiibooyinka Qaranka ee SoDMA, Mudane Maxamuud Macallin Cabdulle ayaa maanta shirweyne muhiim ah ka daah-furay magaalada Muqdisho, kaas oo looga hadlayo qorshaha ka jawaabista baahiyaha bani’adamnimo ee sanadkaan 2024.

Shirkan oo ah mid xasaasi ah ayaa waxaa furitaankiisa ka qayb-galay ku-xigeenka Ergayga gaarka ee xoghayaha guud ee Qaramada Midoobay, ahna xiriiriyaha gargaarka bini’aadamnimo ee Soomaaliya George Conway, sidoo kale waa goobjoog ka ah wasaaraddaha gargaarka dowlad goboleedyada, Hay’addaha ka shaqeeya samafalka, Deeq-bixiyayaasha iyo madax ka socotay hay’adda QM ee ka shaqeeya samafalka.

Hay’addaha dowliga iyo kuwa aan dowliga ahayn ee qabta arrimaha samafalka ayaa shirkan ku dalbaday lacag dhan $1.6 bilyan si loo caawiyo dad gaaraya 5.2 Milyan oo Soomaali ah sanadka 2024.

Guddoomiye Maxamuud Macallin oo sharraxayay lacagtaasi ayaa sheegay inay ka yartatahay mar la eego sanadkii lasoo dhaafay ee 2023-kii oo la wajahay xaalad adag.

“Waxaa hoos u dhacay dalaba, kii hore wuxuu ahaa 2.6 bilyan, meesha uu halkan ka yahay 1.6 bilyan, waxaa dareemi kartiin hoos u dhac weyn oo hal bilyan ah ayaa ku jiro” ayuu yiri guddoomiyaha hay’adda SoDMA.

Sidoo kale wuxuu intaasi sii raaciyay “Soomaaliya way ka fiicnaaneysa sida insha allah, laakiin weli xaaladdii waa ku jirnaa”.

Waxaa kale oo kusii daray in Soomaaliya markan la dhibsaday, sidaas daraadeedna loo baahan yahay inay tashadaan dadka Soomaaliyeed, ayna iyaga is caawiyaan.

Ugu dambeyn wuxuu hoosta ka xariiqay in sanadkii tagay dadka Soomaaliyeed ay isugu darsoomeen fataahado ka dhashay roobabkii Elnino-da kuwaas oo sababay barakac fara badan isagoo sheegay in 80% dadka ku barakacay ay yihiin Caruur iyo Haween.

The post Soomaaliya oo dalbatay $1.6 bilyan oo deg-deg ah + Sababta appeared first on Caasimada Online.