Xasan Sheekh iyo Zellweger oo kulan xasaasi ah ku yeeshay XALANE

[Deeq A.]

Muqdisho (Caasimada Online) – Madaxweynaha Jamhuuriyadda Federaalka Soomaaliya Xasan Sheekh Maxamuud ayaa magaalada Muqdisho kulan xasaasi ah kula yeeshay Valentin Zellweger, oo ah Safiirka dowladda Switzerland u fadhiya Soomaaliya.

Kulankaan oo ka qabsoomay gudaha xerada Xalane ayaa waxay madaxweynaha iyo danjiraha uga wada-hadlaan xiriirka labada dal iyo horumarinta iskaashiga Golaha Ammaanka ee Qaramada Midoobay.

Sidoo kale waxaa kulankaan hoosta looga xariiqay sida ay Soomaaliya uga go’an tahay xoojinta xiriirka diblomaasiyadeed iyo kobcinta iskaashiga dhinacyada muhiimka ah ee caalamiga ah, si wax looga qabto caqabadaha la wadaago loona horumariyo nabadda iyo xasilloonida gobolka.

Kulankaan ayaa imanaya xilli ay meel xasaasi ah mareyso xiisadda Soomaaliya iyo Itoobiya, kadib xad-gudubkii ay Itoobiya kula kacday madax-banaanida Soomaaliya, ayna heshiis beenaad kula saxiixatay Somaliland.

Dowladda federaalka Soomaaliya ayaa weli u muuqata mid taageero caalami ah u raadsaneysa sidii Itoobiya uga laaban laheyd xad-gudubka ay ku kacday iyo difaaca madax-banaanideeda.

Inkasta oo Soomaaliya ay Itoobiya uga adkaatay dhanka diblumaasiyadda, haddana weli Itoobiya kama laaban heshiis beenaadkii ay 1-dii bishaan magaalada Addis Ababa ku gaareen Muuse Biixi iyo Abiy Axmed, wallow ay wajaheyso cadaadis xooggan oo dibadda.

The post Xasan Sheekh iyo Zellweger oo kulan xasaasi ah ku yeeshay XALANE appeared first on Caasimada Online.