Mogadishu: NRC all occupied private properties will be returned

[General Duke]

 

CALI MAHDI MAXAMED: “Wixii Hanti ah oo muuqda kuma jiraan waxyaabaha la isu cafinayo, waana la isu celinayaa”

 

Sabti, July 28, 2007(HOL): Guddoomiyaha Guddiga maamulaya Shirka Dib u heshiisiinta Soomaaliyeed Cali Mahdi Maxamed ayaa maanta mar uu la hadlayay Ergooyinka ka qeybgelaya Shirka Dib u heshiisinta waxaa uu u sheegay in waxyaabaha la isu cafinayo aysan ku jirin hantida muuqata ee la kala heysto.

 

“Wixii Hanti ah oo muuqda kuma jiraan waxyaabaha la isu cafinayo sida Beeraha, Guryaha iyo Gaadiidka, waana la isu celinayaa”ayuu yiri Cali Mahdi Maxamed, iyadoo hadalkaasina ay ergooyinka si weyn u soo dhaweeyeen.

 

Hadalkan uu Cali Mahdi ka horjeediyay Ergooyinka ayaa wuxuu ku soo beegmay iyadoo Ergooyinka metelaya Beelaha Soomaaliyeed ay maalmahan ka doodayeen qodobka xalinta khilaafaadka Beelaha, kaasi oo Beelaha Soomaaliyeed qaarkood ay soo jeediyeen in wixii horay u dhacay xalay-dhalay laga noqdo.

 

Cali Mahdi Maxamed oo ka hadlayay diidamada ka qeybgalka shirka dib u heshiisiinta Soomaaliyeed ee Maxkamadihii Islaamka ayaa sheegay in ay diyaar u yihiin in ay la hadlaan oo ay qanciyaan madaxda Maxkamadihii Islaamka, kuwaasi oo uu sheegay in ay kula kulmayaan meel kasta oo caalamka ah, inkastoo uu caddeeyay in ay horay xiriirro marqaati leh ula sameeyeen qaar ka mid ah madaxda Maxkamadihii Islaamka.

 

Macallin Haaruun Macallin Yuusuf oo ka mid ah Nabaddoonnada Beelaha ****** ayaa sheegay in Beesha ****** ay soo dhaweyneyso eedo ay ka sheegteen Beelaha Digil iyo Mirifle iyo Beesha Shanaad, wuxuuna sheegay in ay diyaar u yihiin in ay mag-dhow ka bixiyaan wixii lagu sheegto.

 

Intii uu socday ka doodista Qodobka Xalinta Khilaafaadka ayaa waxaa jiray Beelo soo jeediyay in lagu tacadiyay intii lagu guda jiray Dagaallada sokeeye, isla markaana lagu sameeyay waxyaabo ka baxsan Bani’aadannimada, walow isla Beelahaas eedda sheegtay ay hadana qireen in ay qudhooda dad waxyeeleen, hayeeshee aysan aad u talax-tegin

 

Dhanka kalena, waxaa maanta tegay xarunta Shirka Dib u heshiisiinta Soomaaliyeed Wafdi ka socday Beesha Caalamka, kaasi oo uu hoggaaminayay ku xigeenka Wakiilka Xoghayaha Guud ee Qaramada Midoobay u qaabilsan Arrimaha Soomaaliya Mr. Barlin Guard, iyadoo xubnaha wafdigaasna ay ka mid ahaayeen wakiillo ka socday Dalalka Talyaaniga, Masar iyo Norway, kuwaasi oo dhamaantood taageeray shirka dib u heshiisiinta Soomaaliyeed.

 

Guddoomiyaha Guddiga Shirka Dib u heshiisiinta Soomaaliyeed Cali Mahdi Maxamed ayaa sheegay xubnahan ay u sheegeen in ay sababo dhinaca duulimaadka ah ay u imaan waayeen xiligii uu furmayay shirka Dib u heshiisiinta Soomaaliyeed, hayeeshee ay haatan u yimaadeen in ay jeediyeen khudbooyinkii ay maalintaas jeedin lahaayeen.

 

Si kastaba arrintu ha ahaatee, Shirka Dib u heshiisiinta Soomaaliyeed oo 15-kii bishan ka furmay Xaruntii Gaadiidka Booliska oo ku taala Degmada C/Casiis ee Gobolka Banaadir ayaa waxaa ka qeybgelaya ergooyin ka badan 1000 Ergay, kuwaasi oo ka kala socda Beelaha Soomaaliya, hayeeshee waxaa qaadacay oo shirkaas in ay ka qeybgalaan diiday Maxkamadihii Islaamka, Qaar ka mid ah Odayaasha Beelaha ****** iyo weliba Xubno la baxay Baarlamaanka Xorta ah oo ku sugan magaalada Asmara ee Dalka Eritrea.

 

Salaad Iidow Xasan (Xiis), Hiiraan Online

 

sxiis@hiiraan.com

 

Mogadishu, Somalia

[General Duke]

Wixii Hanti ah oo muuqda kuma jiraan waxyaabaha la isu cafinayo sida Beeraha, Guryaha iyo Gaadiidka, waana la isu celinayaa”

ayuu yiri Cali Mahdi Maxamed, iyadoo hadalkaasina ay ergooyinka si weyn u soo dhaweeyeen